جاڭالىقتار
ساراپشى: قازاقستاندا اەس سالۋ ەكى ەسە قىمباتقا ءتۇسۋى مۇمكىن
فوتو: envato
قازاقستاندىق باق-تا ەلىمىزدەگى العاشقى اتوم ەلەكتر ستانتسياسىن قىتاي سالادى دەگەن اقپارات تارادى. قىتايدىڭ ۇسىنىسى ەڭ ءتيىمدى باعا رەتىندە كورسەتىلىپ وتىر, دەپ جازدى qandastar.kz
الايدا ەنەرگەتيكا سالاسىنىڭ ساراپشىسى بۇل ماسەلە سونشالىقتى قاراپايىم ەمەس ەكەنىن ايتادى, دەپ حابارلايدى Orda.kz.
مۇناي-گاز سالاسىنىڭ ساراپشىسى نۇرلان جۇماعۇلوۆ ءوزىنىڭ Energy Monitor تەلەگرام-ارناسىندا كوپتەگەن باق قازاقستاندىق اەس-ءتى «قىتايلىق جوبا» رەتىندە ناقتى شەشىلگەن ءىس سياقتى كورسەتىپ جاتقانىن اتاپ ءوتتى. جازىلىپ جاتقانداي, قىتايدىڭ CNNC كورپوراتسياسى قازاقستاندا ەكى رەاكتوردى 5,5 ملرد دوللارعا سالىپ بەرۋگە دايىن ەكەن.
«بىراق بۇل اقپاراتتىڭ العاشقى دەرەككوزى بەلگىسىز. ال كورسەتىلگەن باعا بىلتىر ايتىلعان, ياعني بۇل قىتايدىڭ ءوز ىشىندەگى اەس قۇنى. جوبانىڭ شەتەلدە جۇزەگە اساتىنىن ەسكەرسەك, باعاسى ەكى ەسەگە دەيىن ءوسۋى مۇمكىن (لوگيستيكا, نەسيە پايىزى, ەڭبەك اقى قورى, جەرگىلىكتى رەسۋرستار جانە تاعى باسقالار)», – دەيدى نۇرلان جۇماعۇلوۆ.
CNNC كومپانياسىنىڭ قازاقستاندا اەس سالاتىنى تۋرالى اقپارات كوزى قىتايلىق Toutiao سايتى بولۋى مۇمكىن. ول قازاقستانداعى العاشقى اەس-ءتى سالۋ قۇقىعى ءۇشىن بەيجىڭ مەن ماسكەۋ اراسىندا «ەرتەگىدەي باسەكەلەستىك» بولعانىن, ال بۇل جارىستا قىتاي جەڭىسكە جەتكەنىن جازعان.
الايدا نۇرلان جۇماعۇلوۆ مۇنداي اۋقىمدى جوبانى ءبىر عانا ەلدىڭ كۇشىمەن جۇزەگە اسىرۋ مۇمكىن ەمەس ەكەنىن ەسكە سالادى. پرەزيدەنت توقاەۆ بۇعان دەيىن اەس قۇرىلىسىنا بىرنەشە شەتەلدىك كومپانيا قاتىساتىنىن ناقتى مالىمدەگەن. بۇل جەردە باستى سۇراق – كىم باس مەردىگەر بولادى?
«قازاقستانداعى العاشقى اەس-ءتى وزبەكستانداعى سياقتى حالىقارالىق كونسورتسيۋم سالادى: رەاكتورعا ءبىر كومپانيا, تۋربيناعا باسقا, ال ەلەكترونيكاعا باتىستىق ءوندىرۋشى جاۋاپتى بولادى. كوپۆەكتورلى ءتاسىل قولدانىلادى. بولاشاقتا باتىس ەلدەرىنىڭ ءبىرى شاعىن ءمودۋلدى رەاكتور سالۋعا قاتىسۋى مۇمكىن. رەسمي ناتيجەنى كۇتەيىك. قازىرشە ناقتى شەشىمگە از ۋاقىت قالدى» دەپ قورىتىندىلادى ساراپشى.
ايتا كەتەيىك, بۇعان دەيىن نۇرلان جۇماعۇلوۆ رەسەيدىڭ «روساتوم» مۇددەسىن قولداپ, قازاقستانعا قىسىم كورسەتۋگە تىرىسىپ جاتقانىن دا اتاپ وتكەن بولاتىن
بيىلعى جىلدىڭ باسىندا قازاقستان بيلىگى ەل اۋماعىندا العاشقى اتوم ەلەكتر ستانتسياسىن سالۋ بويىنشا رەسەيمەن «ورتاق شەشىمگە كەلۋ»مۇمكىندىگىن تالقىلادى.
2024 جىلى قىتايدىڭ CNNC كورپوراتسياسى قازاقستانعا ەكى ەنەرگوبلوكتان تۇراتىن اتوم ەلەكتر ستانتسياسىن 5,6 ميلليارد دوللارعا سالۋ تۋرالى سەنساتسيالىق ۇسىنىس جاسادى.
2023 جىلى قازاقستاندا اتوم ەلەكتر ستانساسىن سالۋ ماسەلەسىن رەفەرەندۋم ارقىلى شەشپەك بولدى.
Orda.kz جەو-نىڭ قارىزعا سالىنىپ, تاريف ارقىلى حالىقتىڭ موينىنا ىلىنەتىنى ناقتىلانا تۇسكەنىن, بۇعان اەس-ءتىڭ قانداي قاتىسى بارى تۋرالى زەرتتەۋ ماقالا جاريالادى.
