SARAPShY: NÚKENOVANYŃ BASYNA QAN QUIYLǴAN

Adam taıyp jyǵylyp aýyr jaraqat alýy múmkin emes. Búgin Qýandyq Bıshimbaevtyń isine qatysty kezekte sotta jaýap bergen sot-medıınalyq sarapshy osylaı dedi.

Marqumnyń basyna 230 mılılıtr qan quıylǵany da aıtyldy. Saldarynan mı qysylǵan. Sarapshy 50-60 mılılıtr qannyń ózi adam ómirine asa qaýipti dep otyr. Qosymsha sot-medıınalyq saraptama júrgizgen Tahır Halımnazarov. О́tken otyrystarda Qýandyq Bıshimbaevtyń advokattary ol bergen qorytyndyny jurtqa jarııalamaýdy suraǵan bolatyn. Sebebi, bul — jeke sarapshynyń bergen anyqtamasy.

Biraq ótinish qanaǵattandyrylmady. 30 jyldyq tájirıbesi bar maman marqum alǵan jaraqattardy syzyp turyp kórsetti. Tahır Halımnazarov, sot-medıınalyq sarapshy: — Munyń bári birge bas jaraqaty dep esepteledi. Oǵan bet pen bas súıegi kiredi. Kók túspen — kógergen jerler, qyzylmen – jyrylǵan jerler kórsetilgen. Bul jaraqattar mıdyń zaqymdalýyna ákep soqtyrady. Barlyǵy aýyr jaraqattar jáne ólimge ákep soqtyrady. Bul soqqy alýdyń sebebi. Iaǵnı, marqumdy basynan urǵan. Abaısyzda qulaǵan adam basyn qorǵaıdy, qolyn tireıdi.

Áreket jasaıdy. Tegis jerde turyp qulap ketse, mundaı jaraqattar almaıdy. Aýyr soqqylardyń nátıjesinde Núkenovanyń basyna 230 mılılıtr qan quıylyp, mı qysylǵan. Mundaı ýaqytta suıyqtyqty alyp, ony qutqaryp qalýǵa bolar edi. Alaıda aýyr jaraqattardy eskersek, aman alyp qalý ekitalaı deıdi sarapshy. Tahır Halımnazarov Saltanat Núkenovany kúdikti qylqyndyrǵan da bolýy múmkin deıdi. Sebebi, moıynda saýsaq izderi bar. Zardap shegýshige aýa jetpegen. Tahır Halımnazarov, sot-medıınalyq sarapshy: — Uıyqtap jatqan adamnyń qoryly men aýa jetispeýshilikten qyryldap jatqanyn aıyrý úshin arnaıy bilimniń qajeti joq.

Ony qarapaıym adam da aıqyn ańǵara alady. Marqumnyń aǵasy Qaırat Núkenov ekinshi aıyptalýshy Baqytjan Baıjanovty keshirýge daıyn ekendigin aıtty. Ol úshin Qýandyq Bıshimbaevtyń bólesi bolǵan oqıǵany esh búkpesiz baıandap berýi kerek. Qaırat Núkenov, marqumnyń aǵasy: — Baqytjan Baıjanovtyń balalary bar, áıeli de sot proesine qatysyp júr. Ata-anasyn da kórdik. Meniń oıymsha jaman adamdar emes. Biraq, Baqytjan Baıjanov óziniń bólesiniń kesirinen 5 aı boıy tergeý ızolıatorynda otyr. Eger ol sotta shyndyqty aıtyp berse, biz de buny eskeretin bolamyz. Keshirýge de daıynbyz. Aıta ketý kerek, eks-mınıstr Qýandyq Bıshimbaevqa qatysty sot otyrysy erteń de bolady. Alda ekinshi aıyptalýshy Baqytjan Baıjanovtan jaýap alynady.