سارىاعاش مەدرەسە-كوللەدجى مەملەكەت ەسەبىنەن قارجىلاندىرىلا ما?

سارىاعاش مەدرەسە-كوللەدجى مەملەكەت ەسەبىنەن قارجىلاندىرىلىپ كەلەدى, – دەپ حابارلايدى qandastar.kz inbusiness.kz-كە سىلتەمە جاساپ. بۇل مالىمەتتى تۇركىستان وبلىستىق ءبىلىم باسقارماسىنىڭ ءباسپاسوز قىزمەتى راستادى.

بۇل وقۋ ورنىندا يسلامتانۋ, يمام-حاتيب, ۇستاز ماماندىقتارى بويىنشا شاكىرتتەر ءبىلىم الۋدا.

– مەملەكەتتىك ءبىلىم بەرۋ ستاندارتتارىنا سايكەس, ءدىني سەنىمىنە قاراماستان, ءبىلىم بەرۋ ۇيىمدارى مەملەكەتتىك قولداۋعا, ونىڭ ىشىندە گرانتتارعا ۇمىتكەر بولا الادى. وسىعان وراي, 2018-2024 جىلدار ارالىعىندا سارىاعاش مەدرەسە-كوللەدجىنە رەسپۋبليكالىق بيۋدجەتتەن 1,6 ملرد تەڭگەدەن استام قارجى ءبولىندى. جالپى, 2018-2025 جىلدارى وقۋ ورنىنا 900 گرانت بولىنگەن, – دەلىنگەن باسقارما حابارلاماسىندا.

ايتا كەتەرلىگى, بۇعان دەيىن الەۋمەتتىك جەلىلەردە اتالعان وقۋ ورنىنا مەملەكەتتەن جىل سايىن 200 ملن تەڭگەدەن استام قارجى بولىنەتىنى تۋرالى اقپارات تاراعان بولاتىن.