ساتباەۆ قالاسىن قارا ءتۇتىن باستى

فوتو: بەينەدەن كادر

جەلىدە ۇلىتاۋ وبلىسىنداعى ساتباەۆ قالاسىندا كوشەلەردى قارا كۇيە باسىپ قالعانى كورىنەتىن ۆيدەو تارادى. قالا اكىمدىگى وقيعاعا قاتىستى تۇسىنىكتەمە بەردى, دەپ جازدى qandastar.kz

كادرلاردان مۇزايدىننىڭ بەتىن كۇيە باسقانى كورىنەدى, ياعني جىلۋ قازاندىعىنان شىققان تۇتىننەن قار قاراعا بويالعان. ەر ادام مۇزدىڭ بەتىن قولىمەن سيپاپ, قاپ-قارا الاقانىن كورسەتەدى.

«مىنانى قاراڭىزدار. مىناۋ ەندى بولمايدى. كۇيە شەكتەن تىس ءتۇسىپ جاتىر. اسپانداعى قارا تۇنەكتى قاراڭىزدار, مىناۋ دەگەن ماسقارا عوي. مىنالار شەكتەن شىعىپ كەتتى», – دەيدى ەر ادام.

وبلىس اكىمدىگىنىڭ مالىمەتىنشە, بۇل جىلۋ ءتاريفىن تومەن باعادا ۇستاپ تۇرۋ ءۇشىن ارزان كومىر جاققاننان بولىپ وتىر.

«ساتباەۆ قالاسىنىڭ قازاندىعىندا جىلۋ ەنەرگياسىن ءوندىرۋ ءۇشىن تومەن باعادا ساتىپ الىنعان «مولودەجنىي» كەنىشىنىڭ كومىرى پايدالانىلادى, بۇل جىلۋ ءتاريفىن تومەن باعادا ۇستاپ تۇرۋعا كومەكتەسەدى, بىراق ەكولوگيالىق جاعدايعا جانە جابدىقتىڭ تيىمدىلىگىنە تەرىس اسەر ەتەدى», – دەلىنگەن حابارلامادا.

قالانى جىلۋمەن ۇزدىكسىز قامتاماسىز ەتۋگە باعىتتالعان اۋقىمدى جوندەۋ جۇمىستارى بىلتىر عانا جۇرگىزىلگەن. وعان جالپى سوماسى 1,6 ملرد تەڭگە جۇمسالعان.

«1962 جىلى پايدالانۋعا بەرىلگەن نەگىزگى جابدىق جىل سايىنعى جوندەۋ جۇمىستارىنا قاراماستان, ايتارلىقتاي توزعانىن جانە گاز تازارتۋ جۇيەلەرى تولىعىمەن ەسكىرگەن.

قازىرگى ۋاقىتتا كاسىپورىن جىلۋ ەنەرگياسىمەن ەكولوگيالىق كورسەتكىشتەردى جاقسارتۋعا جانە كەشەندى ەكولوگيالىق رۇقسات الۋعا باعىتتالعان ەڭ ۇزدىك قولجەتىمدى تەحنولوگيالاردى ەنگىزۋ بويىنشا بەلسەندى جۇمىس ىستەپ جاتىر. ەڭ ماڭىزدى جوبا – گاز تازارتۋ جۇيەسىن ورناتۋ», – دەلىنگەن جاۋاپتا