Sátbaev qalasyn qara tútin basty

Foto: beıneden kadr

Jelide Ulytaý oblysyndaǵy Sátbaev qalasynda kóshelerdi qara kúıe basyp qalǵany kórinetin vıdeo tarady. Qala ákimdigi oqıǵaǵa qatysty túsinikteme berdi, dep jazdy qandastar.kz

Kadrlardan muzaıdynnyń betin kúıe basqany kórinedi, ıaǵnı jylý qazandyǵynan shyqqan tútinnen qar qaraǵa boıalǵan. Er adam muzdyń betin qolymen sıpap, qap-qara alaqanyn kórsetedi.

«Mynany qarańyzdar. Mynaý endi bolmaıdy. Kúıe shekten tys túsip jatyr. Aspandaǵy qara túnekti qarańyzdar, mynaý degen masqara ǵoı. Mynalar shekten shyǵyp ketti», – deıdi er adam.

Oblys ákimdiginiń málimetinshe, bul jylý tarıfin tómen baǵada ustap turý úshin arzan kómir jaqqannan bolyp otyr.

«Sátbaev qalasynyń qazandyǵynda jylý energııasyn óndirý úshin tómen baǵada satyp alynǵan «Molodejnyı» kenishiniń kómiri paıdalanylady, bul jylý tarıfin tómen baǵada ustap turýǵa kómektesedi, biraq ekologııalyq jaǵdaıǵa jáne jabdyqtyń tıimdiligine teris áser etedi», – delingen habarlamada.

Qalany jylýmen úzdiksiz qamtamasyz etýge baǵyttalǵan aýqymdy jóndeý jumystary byltyr ǵana júrgizilgen. Oǵan jalpy somasy 1,6 mlrd teńge jumsalǵan.

«1962 jyly paıdalanýǵa berilgen negizgi jabdyq jyl saıynǵy jóndeý jumystaryna qaramastan, aıtarlyqtaı tozǵanyn jáne gaz tazartý júıeleri tolyǵymen eskirgen.

Qazirgi ýaqytta kásiporyn jylý energııasymen ekologııalyq kórsetkishterdi jaqsartýǵa jáne keshendi ekologııalyq ruqsat alýǵa baǵyttalǵan eń úzdik qoljetimdi tehnologııalardy engizý boıynsha belsendi jumys istep jatyr. Eń mańyzdy joba – gaz tazartý júıesin ornatý», – delingen jaýapta