Sátbaev turǵyny Ýkraınadaǵy soǵysqa qatysqany úshin aı saıyn 240 myń rýbl alyp otyrǵan

Sátbaev qalalyq soty beıbitshilik pen adamzat qaýipsizdigine qarsy aýyr qylmys jasaǵan, qarýly qaqtyǵysqa jáne shetel memleketiniń aýmaǵyndaǵy áskerı áreketterge jaldamalylyq belgilerinsiz qasaqana zańsyz qatysqan «G»-ǵa qatysty úkim shyǵardy, dep habarlaıdy qandastar.kz

2022 jyldyń kúzi Jezqazǵan qalasynda júrgen sottalýshy «G», Qazaqstan Respýblıkasynyń azamaty bola otyryp, buqaralyq aqparat quraldary men «Internet» áleýmettik jelisi arqyly sheteldegi qarýly qaqtyǵys pen áskerı áreketter týraly habardar bolyp, ıdeologııalyq maqsatty kózdep, ol óziniń qaıtys bolǵan ákesi «G» (1931 jyly týǵan) Harkov qalasynyń týmasy bolǵandyqtan jáne shetel bıligi orys ultynyń quqyqtaryn shektep jatyr dep sanap,  «V» jekemenshik áskerı kompanııasynyń (ári qaraı – JÁK) quramynda qarýly qaqtyǵysqa qatysý ıdeıasyn júzege asyrýǵa sheshim qabyldaǵan.

 Dalanews.kz jazǵandaı,  osy maqsatta «G» shetel memleketi aýmaǵyndaǵy qarýly qaqtyǵysqa zańsyz qatysý úshin JÁK ókilderimen baılanys ornatýdy bastaǵan.

2022 jyldyń qarasha aıynda qylmystyq nıetin júzege asyra otyryp, «G» Jezqazǵan qalasynan Petropavl qalasyna poıyzben baryp, sol jerden taksımen Qazaqstan Respýblıkasynyń shekarasyn kesip ótip, sheteldegi «Kýrgan» ótkizý pýnkti arqyly ótedi.

JÁK ókilderimen baılanysyp, Krasnodar ólkesindegi «Molkıno» aýylyndaǵy oqý-jattyǵý lagerine baryp, onda JÁK ókilderimen kelisimshart jasap, sheteldegi qarsy qarýly qaqtyǵysqa qatysýǵa nıet bildirgen.

Kelisimshartqa qol qoıý kezinde «G» aı saıynǵy eńbekaqysy 240 000 rýbl ekenin jáne qaza tapqan jaǵdaıda dosy «S»-ǵa 5 000 000 rýbl kóleminde qarjylaı ótemaqy tólenetinine kelisken.

Sol kúni ol JÁK-tiń artıllerııalyq áskerı bóliminiń qarý-jaraq qoımasyna jaýapty bolyp taǵaıyndalyp, 2022 jyldyń 6 jeltoqsanynan bastap 2023 jyldyń 6 shildesine deıin ol shetel Qarýly kúshterine qarsy áskerı tapsyrmalardy oryndap, óz qylmystyq áreketterin jalǵastyrǵan.

2023 jyldyń 28 shildesinde «Vnýkovo – Astana» áýe reısimen Qazaqstan Respýblıkasyna oralǵan.

Osylaısha, «G» Qazaqstan Respýblıkasy Qylmystyq kodeksiniń 172-babynda qarastyrylǵan qylmysty jasap, ıaǵnı shetel memleketi aýmaǵyndaǵy qarýly qaqtyǵysqa Qazaqstan azamaty bola tura zańsyz qatysqan.

Sot otyrysynda sottalýshy óz kinásin tolyq moıyndady, sondaı-aq,  onyń kinási Ulytaý oblysynyń Sátbaev qalalyq UQK basqarmasynyń jedel qyzmetkeriniń raporttarymen, jeke tintý hattamalarymen, turǵylyqty jerin tintý hattamasymen, uıaly telefonyn tekserý hattamasymen, ekinshi deńgeıli bankterdegi qarjylyq tranzakııalar týraly derektermen jáne sotta zerttelgen basqa da dáleldermen dáleldendi.

Sot jaza taǵaıyndaý kezinde qylmystyń qoǵamdyq qaýiptilik dárejesin, aýyrlatatyn jáne jeńildetetin mán-jaılardy eskerdi.

Sot úkimimen «G» Qazaqstan Respýblıkasy Qylmystyq kodeksiniń 172-baby boıynsha kináli dep tanylyp, ortasha qaýipsizdik mekemesinde 4 jyl 6 aı merzimge bas bostandyǵynan aıyrý jazasy kesildi.

Úkim zańdy kúshine engen joq.