جاڭالىقتار
ساتيرالىق پابليك اۆتورى 2 اي قاماۋعا الىنباق
فوتو: الەۋمەتتىك جەلى
سەنبى كۇنى كەشكە الماتىدا سوت Qaznews24 ساتيرالىق پابليگىنىڭ اۆتورى تەمىرلان ەڭسەبەكتى ەكى ايعا قاماۋعا الدى, – دەپ حابارلايدى qandastar.kz
تەمىرلان ەڭسەبەككە تەرگەۋ بارىسىندا ەكى اي قاماۋدا ۇستاۋ تۇرىندەگى بۇلتارتپاۋ شاراسى قولداندى. وعان قىلمىستىق كودەكستىڭ 174-بابى بويىنشا («الەۋمەتتىك, ۇلتتىق, رۋلىق, ناسىلدىك, تاپتىق نەمەسە ءدىني الاۋىزدىقتى قوزدىرۋ») ايىپ تاعىلىپ وتىر.
17 قاڭتاردا “Oyan, Qazaqstan” قوزعالىسىنىڭ بەلسەندىلەرى QazNews24 ساتيرالىق پابليگىنىڭ اۆتورى تەمىرلان ەڭسەبەكتىڭ ۇيىنە ءتىنتۋ جۇرگىزىلىپ جاتقانىن حابارلاعان ەدى. الماتى قالاسى پوليتسيا دەپارتامەنتى ەڭسەبەكتىڭ ۇستالىپ, ۇلتارالىق ارازدىقتى قوزدىرۋ فاكتىسى بويىنشا تەرگەلىپ جاتقانىن راستاعان.
اۆتور ءوز پابليگى تەك ساتيرالىق ماتەريالداردى جاريالايتىنىن, ال ناقتى وقيعالار مەن ادامدارمەن كەز كەلگەن سايكەستىك ء«ابسوليۋتتى كەزدەيسوقتىق” ەكەنىن اتاپ وتكەن. ءوز رەسۋرسىن ول «ساتيرالىق جاڭالىقتار اقپاراتتىق اگەنتتىگى” رەتىندە كورسەتەدى.
