«Satybaldy áýletinen kómek suraǵan»: Jumysshylaryna úı bergen Alagózovtiń eks-áıeli tosyn málimdeme jasady

Foto: https://www.instagram.com/lyaisira_marat/

Kásipker Tursen Alagózovtiń burynǵy jubaıy Lıaısıra Marat málimdeme jasap, kásipkerdiń «100 páter» taratý akııasyna qatysty pikir bildirdi, dep jazdy qandastar.kz

Bul týraly Stan.kz aqparat agenttigi habarlaıdy. 

Bıznes salasynyń ókili eks-jubaıynyń is-áreketin qaıyrymdylyq emes, marketıngtik aıla dep atady. 

“Naǵyz qaıyrymdylyq – eshqandaı paıda kózdemeı, shyn nıetpen jasalatyn kómek. Onda qaıyrymdylyq jasaýshy ádette aty-jónin kórsetpeıdi, jarnamalamaıdy. Al bul jolǵy 2 mıllıard teńge – naýqan aldyndaǵy ónimniń tanymaldylyǵyn arttyrýǵa arnalǵan marketıng bıýdjetiniń jartysyna teń. Shaı satylýy kerek, qoımada qalyp qoımaýy tıis. Ekinshi jaǵynan, bul – adamnyń ımıdjin kóterýdiń bir joly”, – deıdi Lıaısıra Marat.

Sondaı-aq, kezinde eks-jubaıy ózin kezinde kompanııaǵa ıelik etýden shettetýdi suraǵan kórinedi. Ol úshin Satybaldy áýletiniń kómegine júgingen.

“Ol sińlim ekeýmizdi kompanııadan shettetýge kómek suraǵan. Sol kezden bastap bizge qysym kúsheıip, qylmystyq ister ashylyp, komandamyz kúızelis jaǵdaıynda jumys istedi. 2021 jyldyń ortasyna qaraı satý kólemi 35 mıllıard teńgeden asty. Kompanııa mindettemelerden qutyldy, al ónim naryqta tanymal brendke aınaldy. Dál osy kezde, ıaǵnı 2021 jyldyń jazynda meni kompanııadan shyǵaryp jiberdi. Eger qarsylyq bildirsem, bálkim, qazir tiri de bolmas pa edim”, – dep bólisti ol.

Eske salaıyq, «Ajyrasqan qurbylarymmen aralastyrmady» dep Tursen Alagózovtiń burynǵy áıeli otbasyna qatysty qupııany bólisken edi.