ساۋالدارىمىزدىڭ 79 پايىزىنا ۇكىمەت ماردىمسىز جاۋاپ بەردى – ەلنۇر بەيسەنباەۆ

فوتو:parlam.kz

دەپۋتاتتار ۇكىمەتكە جولداعان ساۋالدارىنا ماردىمدى جاۋاپ الا الماعان. بۇل دەگەنىمىز – حالىقتى تولعاندىرعان ماسەلەلەردىڭ جاۋاپسىز قالعانىمەن تەڭ. بۇل تۋرالى AMANAT فراكتسياسىنىڭ جەتەكشىسى, دەپۋتات ەلنۇر بەيسەنباەۆ ايتتى, دەپ جازدى qandastar.kz

AMANAT فراكتسياسىنىڭ دەپۋتاتتارى جىل باسىنداعى وڭىرلەرگە ساپار بارىسىندا 274 ەلدى مەكەنگە بارىپ, 582 كەزدەسۋ وتكىزدى. ساپار قورىتىندىسى بويىنشا سايلاۋشىلاردان مىڭنان استام ارىز-شاعىمدار جيناقتالىپ, ۇكىمەتكە جولداندى. وسىنداعى ءاربىر سۇراقتىڭ ارتىندا حالىقتى تولعاندىرىپ جۇرگەن سانداعان جۇيەلى ماسەلە, مىڭداعان تۇيتكىل مەن ميلليونداعان ادامنىڭ تاعدىرى جاتقانى ءسوزسىز.  سول ساۋالدارعا 20 مينيسترلىكتەن جاۋاپ كەلدى. دەگەنمەن, اشىعىن ايتۋ كەرەك, سۇراقتاردىڭ باسىم بولىگىنە سىرعىتپا جاۋاپتار مەن فورمالدى ۇسىنىستار بەرىلگەن. اتاپ ايتقاندا, رەسپۋبليكالىق دەڭگەيدەگى 355 ناقتى ساۋالدىڭ نەبارى 76-سىنا عانا ءتيىستى جاۋاپ الدىق. ال قالعان 79 پايىزىنا ۇكىمەتتىڭ جاۋاپتارى مۇلدەم ماردىمسىز ءارى دايەكسىز بولدى, – دەدى دەپۋتات.

turkystan.kz جازعانداي,  جىلدار بويى قوردالانعان, قانشاما جاننىڭ تۇرمىس-تىرشىلىگىنە تىكەلەي اسەر ەتەتىن اۋقىمدى ماسەلەلەر تاعى دا شەشۋسىز قالدى دەگەن ءسوز. بۇعان مىسال رەتىندە ول ءمامس جۇيەسىندەگى ولقىلىقتاردىڭ تۇزەلمەۋىن كەلتىردى.

مىسالى, دەنساۋلىق ساقتاۋ سالاسىنا ءمامس-ءتىڭ ەنگىزىلگەنىنە 5 جىلعا اياق باسسا دا, جاڭا جۇيەنىڭ جىرى بىتپەي قويدى. ءالى دە جۇيەدەن تىس 3,5 ميلليون حالىق بولسا, ونىڭ ارتىندا جۇيەلى جارناسىن تولەسە دە, جۇيەسىز قىزمەت الاتىنداردىڭ سانى ودان الدەقايدا كوپ. ماسەلەن, بىلتىر ءۇش ايدىڭ ىشىندە استانا تۇرعىندارىنان الەۋمەتتىك مەديتسينالىق ساقتاندىرۋ قورىنا 1 680 ءوتىنىش تۇسسە, ونىڭ  70%-ى شاعىم بولعان. ءماجىلىس مىنبەرىنەن 3 جىل بويى مەديتسينالىق ساقتاندىرۋ جۇيەسىنىڭ سىن كوتەرمەيتىنىن ايتساق تا, ۇكىمەتتە نە ءبىر ۇسىنىس, نە ءبىر شەشىم بولماي كەلەدى. ءۇش جىلدا ءۇش مينيستر اۋىسقانىمەن, مەديتسينالىق ساقتاندىرۋ ماسەلەسىندە ناقتى ءۇش ماسەلە دە شەشىلمەدى.  شاعىم ازايمادى, كەزەك كەمىمەدى, ساپا جاقسارمادى. ياعني قازاقستاندا بايلار ەمدەلمەيتىن, كەدەيلەر ەمدەلە المايتىن جاعداي ءالى دە ورىن الۋدا, – دەدى ەلنۇر بەيسەنباەۆ.

سونىمەن قاتار, دەپۋتات جۇمىسسىزدىقتىڭ ازايماۋى تۋرالى دا ءسوز قوزعادى.

تسيفرلانعان زاماندا ستاتيستيكانى بۇرمالاۋ – اۋرۋىن جاسىرعانمەن تەڭ. مىسالى, ۇكىمەتكە سەنسەك, سوڭعى 15 جىل بويى جۇمىسسىزدىق – 4-5 پايىزدىق وزگەرمەيتىن كورسەتكىشتە تۇر. ال شىندىعىندا,  ەلىمىزدە جۇمىسسىزداردىڭ سانى 10-12 پايىز, ياعني 1 ميلليوننان استام. وعان دالەل – ءمامس جۇيەسىنەن تىس قالعان 3,5 ميلليون ادام, ءتىپتى 1 تەڭگەلىك زەينەتاقى جارناسى جوق 3 ميلليون ازامات, ءوزىن-ءوزى جۇمىسپەن قامتىعان 2 ميلليون ادام,  «NEET» ساناتىنداعى 400 مىڭ جاس. بۇلاردىڭ بارلىعى ەشبىر تىركەۋدە جوق, مۇلدەم تابىسى جوق. تابىسى بولسا, ونىڭ ءوزى ماۋسىمدىق تابىس. بۇعان قوسا, 2027 جىلعا قاراي ەڭبەك نارىعىنا قوسىمشا تاعى 300 مىڭ جاس قوسىلادى. ال ۇكىمەت وعان دايىن ەمەس. وڭىرگە ساپار بارىسىندا دا حالىقتىڭ ەڭ كوپ سۇرايتىنى – وسى جۇمىسپەن قامتۋ ماسەلەسى. «ەكى قولعا ءبىر كۇرەك تابىلار» دەگەن حالىق ءتامسىلى تالاي اۋىل جۇرتىنا ارمان بولىپ وتىر. سوندىقتان ماسەلەنى جاسىرىپ جاپپاي, ستاتيستيكانى بۇرمالاماي, ناقتى جۇمىس ورىندارىن اشۋ بويىنشا جۇيەلى شارالاردى قولعا العان ءجون.

دەپۋتاتتىڭ ايتۋىنشا, سايلانعان اۋىل اكىمدەرىنىڭ قۇزىرەتىن ارتتىرۋ ماسەلەسى وتە وزەكتى.

پرەزيدەنتتىڭ قولعا العان رەفورمالارىنىڭ ناتيجەسىندە ەلىمىزدە اۋىل جانە كەنت اكىمدەرى سايلاندى. حالىق ءوزى سايلاعاننان كەيىن اكىمنەن ناتيجەلى جۇمىستى تالاپ ەتەتىنى بەلگىلى. الايدا اكىمدەردىڭ ءتيىستى قۇزىرەتى بولماعاندىقتان, قولى قىسقا. ماسەلەن, اۋىلداعى مەكتەپتە جىلىتۋ جۇيەسى ىستەن شىقسا, ونى وبلىستاعى ءبىلىم باسقارماسىنىڭ نۇساۋىنسىز شەشۋ مۇمكىن ەمەس.  ۇكىمەتتىڭ كوشى-قون باعدارلاماسى مۇلدەم ىسكە اسپادى. مىسالى, سوڭعى بەس جىلدا شىعىستا 350 اۋىل, سولتۇستىك پەن پاۆلودار وڭىرىندە 987 اۋىل بوس قالدى. بۇل – جاي عانا اۋىلدىڭ سانى ەمەس, مىڭداعان وتباسىنىڭ تۋعان جەرى, ۇشقان ۇياسى, ءومىرىنىڭ تاريحى.  ەڭ قىزىعى – ۇكىمەتتىڭ ۋادەسىنە سەنىپ تەرىسكەيگە كوشكەندەردىڭ كوبى قايتا كوشىپ كەتتى. وعان قوسا, شامامەن 2050 جىلى وڭتۇستىكتىڭ حالقى ەكى ەسەگە وسسە, تەرىسكەيدە كەرىسىنشە ەكى ەسەگە ازايادى دەگەن بولجام بار. سوندىقتان بۇل جوباعا بارىنشا ۇلتتىق مارتەبە بەرىپ, ەلىمىزدىڭ نەگىزگى ءارى سەرپىندى يدەولوگيالىق, دەموگرافيالىق قوزعالىسىنا اينالدىرۋىمىز كەرەك. كورىپ وتىرعاندارىڭىزداي, دەپۋتاتتار بارلىق ماسەلەدەن حاباردار. ەلمەن ەتەنە ارالاسىپ, ءاربىر ماسەلەنى شەشۋ ءۇشىن جۇمىس جاساپ جاتىر. پرەزيدەنتىمىز ايتقانداي, ەندى ۇكىمەت باتىل جانە ۇتىمدى شەشىم قابىلداۋى ءتيىس. حالىق بىزدەن وسىنى كۇتەدى, – دەپ ءسوزىن تۇيىندەدى ەلنۇر بەيسەنباەۆ.