ساياسات نۇربەك 11-سىنىپ وقۋشىسىن وقۋدان شىعارۋ توڭىرەگىندەگى داۋعا ۇلاسقان ماسەلەگە پىكىر ءبىلدىردى

مينيستر بۇل ماسەلەنىڭ وڭاي ەمەستىگىن اتاپ ءوتىپ, اكادەميالىق ادالدىق مادەنيەتىن قالىپتاستىرۋ قاجەتتىگىن ايتتى: كوشىرۋ مەن جۇمىستى ءوز بەتىنشە ورىنداۋدان باس تارتۋ – ەڭ الدىمەن, ادامنىڭ وزىنە زيان.

«بۇل – ستۋدەنت نەمەسە وقۋشى ءوزى مەڭگەرە الماعان ءبىلىم. قازىر نزم-دە وقۋشىنى وقۋدان شىعارۋ ماسەلەسى توڭىرەگىندە داۋ تۋىنداپ وتىر – بۇل دۇرىس شەشىم. سەبەبى اكادەميالىق ادالدىق قاعيداتتارىنسىز ساپالى ءبىلىم بەرۋ جۇيەسىن قۇرۋ مۇمكىن ەمەس. ەڭ مىقتى ءبىلىم بەرۋ جۇيەلەرى, اكادەميالىق ادالدىققا نەگىزدەلگەن -كانادالىق, سولتۇستىك امەريكا جانە جاپونيا جۇيەلەرى», – دەدى ساياسات نۇربەك.

ونىڭ ايتۋىنشا, ەگەر انتيپلاگيات مادەنيەتى قاتاڭ تۇردە قالىپتاسسا, ءبىلىم ساپاسى دا جوعارى بولادى.

«سوندىقتان مەنىڭ ويىمشا, بۇل (وقۋشىنى وقۋدان شىعارۋ – رەد.) دۇرىس شەشىم بولدى. مۇنداي جاعدايلاردا ءبىز اكادەميالىق ادالدىق قاعيداتتارىن ۇستانۋىمىز كەرەك», – دەپ تولىقتىردى مينيستر.

ايتا كەتسەك, نازارباەۆ زياتكەرلىك مەكتەبىنىڭ 11-سىنىپ وقۋشىسى سۇڭقار مايقان وقۋ جىلىنىڭ اياقتالۋىنا بىرنەشە كۇن قالعاندا, وزگە وقۋشىلاردىڭ كوزىنشە مۇعالىمگە بالاعات ءسوز ايتىپ, ءتىل تيگىزگەنى ءۇشىن وقۋ ورداسىنان شىعارىلعان. الايدا, جاس جەتكىنشەك, كەيىنىرەك ءوزىنىڭ كىناسىن مويىنداپ, كەشىرىم سۇراعان بولاتىن. دەگەنمەن, ونىڭ بۇل ارەكەتىنە مەكتەپ اكىمشىلىگى تاراپىنان «مەكتەپكە قايتا قابىلداۋ» تۋرالى جاعىمدى جاڭالىق بولا قويمادى. وسىلايشا, بىرنەشە كۇن قاتارىنان تاماق ىشپەي, دەپرەسسياعا تۇسكەن وقۋشى 26 مامىر كۇنى جەدەل جاردەممەن اۋرۋحاناعا جەتكىزىلدى. بۇگىندە ول قاجەتتى ەم-دوم شارالارىن الۋدا. سونداي-اق, كۇنى كەشە 28 مامىردا نزم باسشىسى وقۋ ورداسى تۇپكىلىكتى شەشىمىن وزگەرتپەيىنىن ايتىپ, مالىمدەمە جاساعان بولاتىن. بۇل رەتتە, قوعامدا رەزونانس تۋعىزعان ىسكە بىرقاتار شەنەۋنىكتەر مەن بالالار قۇقىقتارى جونىندەگى ۋاكىلدەر, سونداي-اق, مينيستر عاني بەيسەمباەۆ پىكىر ءبىلدىردى.