Saıasat Nurbek 11-synyp oqýshysyn oqýdan shyǵarý tóńiregindegi daýǵa ulasqan máselege pikir bildirdi

Mınıstr bul máseleniń ońaı emestigin atap ótip, akademııalyq adaldyq mádenıetin qalyptastyrý qajettigin aıtty: kóshirý men jumysty óz betinshe oryndaýdan bas tartý – eń aldymen, adamnyń ózine zııan.

«Bul – stýdent nemese oqýshy ózi meńgere almaǵan bilim. Qazir NZM-de oqýshyny oqýdan shyǵarý máselesi tóńireginde daý týyndap otyr – bul durys sheshim. Sebebi akademııalyq adaldyq qaǵıdattarynsyz sapaly bilim berý júıesin qurý múmkin emes. Eń myqty bilim berý júıeleri, akademııalyq adaldyqqa negizdelgen -Kanadalyq, Soltústik Amerıka jáne Japonııa júıeleri», – dedi Saıasat Nurbek.

Onyń aıtýynsha, eger antıplagıat mádenıeti qatań túrde qalyptassa, bilim sapasy da joǵary bolady.

«Sondyqtan meniń oıymsha, bul (oqýshyny oqýdan shyǵarý – red.) durys sheshim boldy. Mundaı jaǵdaılarda biz akademııalyq adaldyq qaǵıdattaryn ustanýymyz kerek», – dep tolyqtyrdy mınıstr.

Aıta ketsek, Nazarbaev Zııatkerlik mektebiniń 11-synyp oqýshysy Suńqar Maıqan oqý jylynyń aıaqtalýyna birneshe kún qalǵanda, ózge oqýshylardyń kózinshe muǵalimge balaǵat sóz aıtyp, til tıgizgeni úshin oqý ordasynan shyǵarylǵan. Alaıda, jas jetkinshek, keıinirek óziniń kinásin moıyndap, keshirim suraǵan bolatyn. Degenmen, onyń bul áreketine mektep ákimshiligi tarapynan «mektepke qaıta qabyldaý» týraly jaǵymdy jańalyq bola qoımady. Osylaısha, birneshe kún qatarynan tamaq ishpeı, depressııaǵa túsken oqýshy 26 mamyr kúni jedel járdemmen aýrýhanaǵa jetkizildi. Búginde ol qajetti em-dom sharalaryn alýda. Sondaı-aq, kúni keshe 28 mamyrda NZM basshysy oqý ordasy túpkilikti sheshimin ózgertpeıinin aıtyp, málimdeme jasaǵan bolatyn. Bul rette, qoǵamda rezonans týǵyzǵan iske birqatar sheneýnikter men balalar quqyqtary jónindegi ýákilder, sondaı-aq, mınıstr Ǵanı Beısembaev pikir bildirdi.