ساياسات نۇربەك پرەزيدەنت عىلىم سالاسىن دامىتۋعا مۇددەلى ەكەنىن ايتتى

فوتو: اقوردا

مەملەكەت باسشىسى قاسىم-جومارت توقاەۆ ۇكىمەتتىڭ كەڭەيتىلگەن وتىرىسىندا ۇكىمەت جۇمىسىنىڭ باستى باعىتتارىن ايقىنداي وتىرىپ, ونىڭ ىشىندە ءبىلىم بەرۋ جانە عىلىم سالاسىن ودان ءارى دامىتۋ جونىندەگى ناقتى مىندەتتەر مەن جوسپارلارعا توقتالدى. بۇل تۋرالى عىلىم جانە جوعارى ءبىلىم ءمينيسترى ساياسات نۇربەك ايتتى, دەپ حابارلادى qandastar.kz

«پرەزيدەنت ءوز سوزىندە ەلىمىزدىڭ جاڭا تەحنولوگيالىق داۋىرگە قادام باسىپ جاتقانىن, تسيفرلاندىرۋدىڭ ماڭىزدىلىعىن اتاپ ءوتتى. بۇل رەتتە «ادام كاپيتالىن دامىتۋدى جانە جوعارى وقۋ ورىندارىن ءبىلىم بەرۋدەن عىلىمي-زەرتتەۋ تاسىلدەرىنە كوشىرۋدى كوزدەيتىن «AI-Sana» جاساندى ينتەللەكتىنى وقىتۋ باعدارلاماسىنىڭ ماڭىزى ارتىپ كەلەدى», – دەدى ول.

ەلدىڭ عىلىمي-تەحنولوگيالىق دامۋىنا جاڭا سەرپىن بەرە وتىرىپ, بىلىكتى كادرلاردى دايارلاۋ جانە جاساندى ينتەللەكت تەحنولوگيالارىن دامىتۋ ءۇشىن قولايلى جاعدايلار جاساۋعا باعىتتالعان جاساندى ينتەللەكت بويىنشا AI-Sana باعدارلاماسى – ستۋدەنتتەر اراسىندا جاساندى ينتەللەكت داعدىلارىن جان-جاقتى دامىتۋعا باعىتتالعان بىرەگەي باعدارلاما. 100 مىڭ قاتىسۋشىنى قامتي وتىرىپ, ۇلتتىق ەكونوميكانىڭ الەۋەتىن اشۋعا جانە تەحنولوگيالىق كاسىپكەرلىكتى قولداۋعا باعىتتالعان بۇل باعدارلاما ەلىمىزدىڭ تسيفرلىق ترانسفورماتسياسىنا ىقپال ەتەرى ءسوزسىز.

مەملەكەت باسشىسى ءبىلىم بەرۋ مەن عىلىمدى دامىتۋ ماسەلەسىنە دە ەرەكشە ءمان بەردى. عىلىم جانە جوعارى ءبىلىم سالاسىنداعى رەفورمالاردىڭ قارقىنى مەن ساپاسىن ساقتاۋ ماڭىزدى ەكەنىن ايتا وتىرىپ, ءبىلىم بەرۋ تاپسىرىسىن وقۋ ورىندارىنىڭ رەيتينگىنە قاراي ءبولۋ جۇمىسى ۇكىمەتتىڭ باقىلاۋىندا بولۋى ءتيىس ەكەنىن ايتتى», – دەدى مينيستر.