ساياساتكەر: مەدياكەڭىستىك جەڭىل اڭگىمەگە تولى, ماڭىزدى ماسەلەلەرگە ساراپتاما جاسالمايدى

فوتو: اشىق دەرەككوز

ۇكىمەتتە جۋرناليستەر وتستاۆكاعا كەتۋ, تاعى دا باسقا ماسەلەگە قاتىستى ارانداتاتىن سۇراقتار قويادى. سونىڭ اسەرىنەن اقپاراتتىق كەڭىستىك قاجەتسىز جاڭالىقپەن تولىعىپ, تالقىلانۋى ءتيىس تاقىرىپتار تىسقارى قالىپ جاتىر دەپ ايتتى ساياساتتانۋشى دانيار اشىمباەۆ, – دەپ حابارلايدى qandastar.kz

«رومان سكليار بۇگىنگى بريفينگتە ورىنسىز ساۋالداردى اتاپ ءوتتى. ءبىر جاعىنان, مينيسترلەر وزەكتى سۇراقتارعا جاۋاپ بەرىپ, ءوز ۇستانىمدارىن دالەلدەپ, پىكىرتالاس جۇرگىزە الۋى كەرەك. ەكىنشى جاعىنان, ءىس جۇزىندە ۇكىمەتكە قانداي دا ءبىر باقىلاۋ ەنگىزۋ قاجەت. ويتكەنى قازىر ساراپتاماعا ەمەس, سىبىستارعا نەگىزدەلگەن حايپ اڭگىمەلەرگە دەن قويىلادى. يدەولوگيا ەمەس, جەكە مۇددە العا شىعىپ تۇر» دەپ جازدى ول تەلەگرام ارناسىندا.

ايتا كەتەيىك, جاقىندا پرەزيدەنت قوعامنىڭ اكىمدەرگە قويار تالابى ارقاشان جوعارى ەكەنىن ايتا كەلە, اكىمدەردىڭ ءار قادامىن اڭدىپ, ءجونسىز كيلىگەتىندەردى دە سىنادى.

«قوعامنىڭ اكىمدەرگە قوياتىن تالابى قاشاندا جوعارى. بۇل – زاڭدى قۇبىلىس. اكىمنىڭ جۇمىسىنا سىن كوزبەن قاراۋ – دەموكراتيالىق قوعامعا ءتان قالىپتى نارسە. بىراق سىناعاننىڭ ءجونى وسى ەكەن دەپ, تىم ارتىق كەتەتىن اسىرە بەلسەندىلەر دە بار. ءوزىن بلوگەر سانايتىن كەيبىر ادامدار اكىمنىڭ ءار قادامىن اڭدۋدى ادەتكە اينالدىردى. جۇمىسقا كەدەرگى جاساپ, ءتىپتى, قوقان-لوقى كورسەتەتىندەر بار. ارينە, اۋىل, اۋدان نەمەسە قالا تۇرعىندارى بولسىن, بارلىعى جايلى ءومىر سۇرگىسى كەلەدى. ازاماتتارعا بارىنشا قولايلى جاعداي جاساۋ – اكىمگە دە, جەرگىلىكتى ماسليحاتتارعا دا ورتاق مىندەت», – دەدى پرەزيدەنت.