«Sekta ustaıdy»: Aýyl turǵyndary qaýipti ıtterdi asyraǵan ortalyqqa alańdaýshylyq bildirdi

Foto: Stan.kz kollajy

Almaty mańyndaǵy aýylda ıtterdiń shabýylynan keıin janjal shyqty, dep jazdy qandastar.kz.

Endi turǵyndar qaýipti janýarlardy «dinı sektanttarǵa» tıesili ortalyq ustaǵanyn aıtyp, balalardyń qaýipsizdigi úshin alańdaýly.

Aýyl turǵyndarynyń aıtýynsha, balalarǵa shabýyl jasaǵan ıtter  «Bostandyq» atty ońaltý ortalyǵyna tıesili. Bul uıym jaıly ashyq derekkózderde aqparat az, al kompanııalar bazasynda múlde tirkelmegen. Soǵan qaramastan, ortalyq 20 jyldan astam jumys isteıdi. Jergilikti halyq onyń artynda «protestanttyq sekta» tur dep esepteıdi.

«Bul sekta, bári biledi. О́zimniń týǵan naǵashym sol jerde. Týystarymnyń jartysy sol jerde. Olar erekshe kitappen duǵa jasaıdy. Aı saıynǵy tabystarynyń 10 paıyzyn jetekshisine tapsyrady. О́z kózimmen kórdim. Bular kádimgi hrıstıandar da, musylmandar da emes, tipti baptıster de emes. О́z júıeleri bar», – deıdi aýyl turǵyny Álııa.

Shabýyl bolǵan jerdiń qasynda balabaqsha ornalasqan. Jergilikti turǵyndar qaýipsizdikteri úshin alańdaıdy.

«Bizge keregi – tek ádildik pen balalardyń qaýipsizdigi», – deıdi olar.

Turǵyndardyń aıtýynsha, ortalyq ıeleri tek balany qutqaryp qalǵan azamatqa emes, jábirlenýshiniń otbasyna da qoqan-loqy kórsetip jatyr.

Jergilikti belsendilerdiń sózinshe, Ekaterına jalǵyzbasty ana, bes balasy bar. Bir qyzyn jerlegen, bir uly – I top múgedegi. Olar jaldamaly úıde turady.

«Búgin balany Qaskeleńdegi jansaqtaý bóliminen oblystyq aýrýhanaǵa aýystyrdy. Ekaterına bir táýlik balasynyń qasynda bolǵan, ony ápkesi almastyrdy. Áıel óte sharshaǵan, moraldyq jáne fızıkalyq turǵyda kúızelgen», – dedi eriktiler.

Jergilikti belsendiler men eriktiler jábirlenýshi otbasyna kómek kórsetý úshin bastamashyl top qurýǵa sheshim qabyldady. Olar ortalyq ıeleriniń tarapynan qysym bolýy múmkin ekenin, isti «jabýǵa» tyrysatynyn joqqa shyǵarmaıdy.

«Qorqytyp-úrkitý nemese satyp almaq bolýy múmkin. Biz buǵan jol bermeımiz», – dedi jergilikti belsendiler.