ءبىلىم
سەمەيدە وقۋشى قىزدى زورلاعان مۇعالىم ءومىر بويىنا باس بوستاندىعىنان ايىرىلدى
فوتو: Ru.freepik.com
اباي وبلىسىندا وقۋشى قىزدى زورلاعان مۇعالىمگە قاتىستى سوت شەشىمى شىقتى, دەپ جازدى qandastar.kz
بۇل تۋرالى Stan.kz اقپارات اگەنتتىگى حابارلايدى.
كامەلەتكە تولماعان قىزدى زورلاۋ فاكتىسى بويىنشا قىلمىستىق ءىس قىلمىستىق ىستەر جونىندەگى مامانداندىرىلعان اۋدانارالىق سوتتا قارالدى. سوت پروتسەسى جابىق رەجيمدە ءوتتى.
2024 جىلدىڭ قاراشا ايىندا سەمەي قالاسىنىڭ پوليتسياسى مەكتەپ وقۋشىسىنىڭ اناسىنىڭ ارىزى بويىنشا تەرگەۋ باستادى. كامەلەتكە تولماعانعا قاتىستى سەكسۋالدىق سيپاتتاعى زاڭسىز ارەكەتتەر فاكتىسى بويىنشا سوتقا دەيىنگى تەرگەپ-تەكسەرۋ جۇرگىزىلدى. 32 جاستاعى سەمەي تۇرعىنى كۇدىكتى رەتىندە ۇستالدى. بىلىم ءبولىمىنىڭ مالىمەتىنشە, ول 2022 جىلدان بەرى قالالىق مەكتەپتەردىڭ بىرىندە باستاپقى اسكەري دايىندىق ءپانىنىڭ مۇعالىمى بولىپ جۇمىس ىستەگەن.
قىلمىس 2024 جىلدىڭ شىلدە ايىندا بولعان. ول كەزدە ايىپتالۋشى 32 جاستا, ال جابىرلەنۋشى 14 جاسقا تولماعان ەدى. تەرگەۋ نۇسقاسىنا سايكەس, كۇدىكتى وقۋشىنى كولىكتە زورلاعان.
قىلمىستىق ءىس قىلمىستىق كودەكستىڭ 120-بابى 4-بولىگى (كامەلەت جاسقا جەتپەگەن, 14 جاسقا تولماعاندى زورلاۋ) بويىنشا دەرەگىمەن قارالدى.
پروكۋرور ايىپتالۋشىعا ءومىر بويىنا باس بوستاندىعىنان ايىرۋ جازاسىن تاعايىنداۋدى سۇرادى. ونىڭ بۇل تالابىن جابىرلەنۋشىنىڭ زاڭدى وكىلى مەن ادۆوكاتى دا قولدادى. ال ايىپتالۋشى مەن ونىڭ قورعاۋشىسى سوتتالۋشىنى اقتاۋدى تالاپ ەتتى.
“سوت ءىستى جان-جاقتى زەرتتەپ, ايىپتالۋشىنىڭ قىلمىس جاساعانى ءىس ماتەريالدارىمەن تولىق دالەلدەندى”, – دەپ مالىمدەدى سوت توراعاسى نياز حاسەنباەۆ.
سوت ۇكىمى بويىنشا مۇعالىم كىنالى دەپ تانىلىپ, وعان ءومىر بويىنا باس بوستاندىعىنان ايىرۋ جازاسى تاعايىندالدى. سونىمەن قاتار سوت ونى پەداگوگيكالىق قىزمەتپەن جانە كامەلەتكە تولماعاندارمەن جۇمىس ىستەۋگە بايلانىستى كەز كەلگەن لاۋازىمدى ءومىر بويىنا اتقارۋ قۇقىعىنان ايىردى.
سوتتالۋشى جازاسىن توتەنشە قاۋىپسىز مەكەمەدە وتەيدى. ۇكىم زاڭدى كۇشىنە ەنگەن جوق.
“ازاماتتىق كودەكسكە سايكەس, 14 جاسقا دەيىنگى تۇلعالار ءجاسوسپىرىم بولىپ ەسەپتەلەدى. كەلىسىمگە قاراماستان, ەگەر ايىپتالۋشى جابىرلەنۋشىنىڭ 14 جاسقا تولماعانىن بىلگەن بولسا, جاۋاپكەرشىلىك تولىق كولەمدە قاراستىرىلادى. مۇنداي ىستەر بويىنشا ءومىر بويىنا باس بوستاندىعىنان ايىرۋ جازاسى قاراستىرىلعان, – دەپ اتاپ ءوتتى نياز حاسەنباەۆ.
سوتتا 14 جاسقا تولماعان ادامدى زورلاعانى ءۇشىن زاڭ بويىنشا تەك ءومىر بويىنا باس بوستاندىعىنان ايىرۋ جازاسى كوزدەلگەنى ايتىلدى. مۇنداي جازا ايىپتالۋشى مەن جابىرلەنۋشى اراسىنداعى قارىم-قاتىناس سيپاتىنا قاراماستان تاعايىندالادى.
