سەمەيدە شىرشا بەزەندىرۋ كەزىندە بيىكتەن قۇلاعان مۇعالىمنىڭ ايەلى بيلىكتەن وتەماقى تالاپ ەتتى

فوتو: اشىق دەرەككوز

سەمەيدە شىرشا بەزەندىرەمىن دەپ بيىكتەن قۇلاپ, اۋىر جاراقات العان مۇعالىمنىڭ ايەلى بيلىكتەن وتەماقى تالاپ ەتتى, دەپ حابارلايدى qandastar.kz

مۇعالىمنىڭ جارى سىمبات ايانقىزى كتك تەلەارناسىنا ناۋقاستىڭ ءالى جارتى جىل ەم الۋى قاجەت ەكەنىن جەتكىزدى.

ونىڭ ايتۋىنشا, 23 جاستاعى مۇعالىم قۋات ايتقالي وزدىگىنەن ءجۇرىپ-تۇرا المايدى. سوندىقتان ونى كۇتىپ, قاراۋ ءۇشىن دە ءبىر ادام قاسىندا وتىرۋى قاجەت.

“دارىگەرلەر ونىڭ ميىنا قۇيىلعان قاندى توقتاتىپ, سىنعان باس سۇيەگىنىڭ جارتىسىن الىپ تاستاعان. ەندى ەكى ايدان كەيىن ونىڭ ورنىنا پلاستماسسا سالۋ ءۇشىن قايتا وتا جاسالادى.

جابىرلەنۋشىنىڭ ايەلى ۇستازدارعا شاھار باسشىسىنىڭ ورىنباسارى مەن ءبىلىم ءبولىمىنىڭ باسشىلارى شىرشانىڭ باسىنا شىعۋعا بۇيرىق بەرگەنىن ايتادى. سەمەيدەگى باس شىرشانى بەزەندىرۋگە بارلىعى ون مەكتەپتىڭ مۇعالىمدەرى جۇمىلدىرىلعان ەكەن”, — دەيدى كتك تەلەارناسى.

مۇعالىمنىڭ ايەلى قاعاز جۇزىندە بولماسا دا, بۇيرىق اۋىزشا بەرىلگەنى انىق دەپ وتىر. ەندى تەرگەۋ اياقتالعان سوڭ ادۆوكات جالداپ, وتەماقى تالاپ ەتۋ ءۇشىن سوتقا جۇگىنبەك.

ء“بىز بارلىعىن زاڭ جۇزىندە ىستەپ جاتىرمىز. قازىر 362-باپتىڭ ءتورتىنشى تارماعى بويىنشا قىلمىستىق ءىس قوزعالدى. تەرگەۋ ءجۇرىپ جاتىر. بارلىعىنان سۇراق الىنىپ جاتىر. ەندى الداعى ۋاقىتتا سوت ءادىل وتەدى دەگەن شەشىمدەمىز. تەرگەۋ قالاي بىتەدى, كىمدى كىنالى قىلادى, ءبىز سولارعا ارىز جازىپ, ءبارىن سوتپەن شەشەمىز”, – دەيدى سىمبات ايانقىزى. 

ايتا كەتەيىك, 9 قاڭتاردا اۋىر جاراقات العان سەمەيلىك مۇعالىم قۋات ايتقاليەۆتىڭ اۋرۋحانادان شىققانى تۋرالى جازعان ەدىك.

وقۋ-اعارتۋ ءمينيسترى عاني بەيسەمباەۆتىڭ ايتۋىنشا, قازىرگى ۋاقىتتا مۇعالىمگە وتەماقى تولەۋ ماسەلەسى قاراستىرىلىپ جاتىر.

ەسكە سالايىق, بۇعان دەيىن سەمەيدە جاڭا جىلدىق شىرشانى بەزەندىرۋ كەزىندە مۇعالىم بيىكتەن قۇلاپ, اۋىر جاراقات العان ەدى.

وقۋ-اعارتۋ ءمينيسترى عاني بەيسەمباەۆ Facebook-تەگى پاراقشاسىندا اتالعان وقيعاعا بايلانىستى وبلىس باسشىلىعى ءادىل ءارى جان-جاقتى تەكسەرۋ جۇرگىزۋ كەرەك ەكەنىن ايتقان بولاتىن.

«سەمەي قالاسىندا مۇعالىمدەردى جاڭاجىلدىق شىرشانى بەزەندىرۋگە تارتۋ جانە ارىپتەسىمىزدىڭ وسى ءىس بارىسىندا جاراقات الۋى — زاڭ بۇزۋشىلىقتىڭ ايقىن كورىنىسى. پەداگوگتەردى كاسىبي مىندەتتەرىنە جاتپايتىن مۇنداي جۇمىستارعا تارتۋ — «پەداگوگ مارتەبەسى تۋرالى» زاڭدى ورەسكەل بۇزۋ دەپ سانايمىن. بۇل وقيعاعا بايلانىستى وبلىس باسشىلىعى ءادىل ءارى جان-جاقتى تەكسەرۋ جۇرگىزىپ, الداعى ۋاقىتتا مۇنداي كەلەڭسىزدىكتەردىڭ قايتالانۋىنا جول بەرمەۋ ءۇشىن ءتيىستى شارالار قابىلدايدى دەپ ۇمىتتەنەمىن», — دەپ جازدى ول.