Semeıde shyrsha bezendirý kezinde bıikten qulaǵan muǵalimniń áıeli bılikten ótemaqy talap etti

Foto: ashyq derekkóz

Semeıde shyrsha bezendiremin dep bıikten qulap, aýyr jaraqat alǵan muǵalimniń áıeli bılikten ótemaqy talap etti, dep habarlaıdy qandastar.kz

Muǵalimniń jary Symbat Aıanqyzy KTK telearnasyna naýqastyń áli jarty jyl em alýy qajet ekenin jetkizdi.

Onyń aıtýynsha, 23 jastaǵy muǵalim Qýat Aıtqalı ózdiginen júrip-tura almaıdy. Sondyqtan ony kútip, qaraý úshin de bir adam qasynda otyrýy qajet.

“Dárigerler onyń mıyna quıylǵan qandy toqtatyp, synǵan bas súıeginiń jartysyn alyp tastaǵan. Endi eki aıdan keıin onyń ornyna plastmassa salý úshin qaıta ota jasalady.

Jábirlenýshiniń áıeli ustazdarǵa shahar basshysynyń orynbasary men bilim bóliminiń basshylary shyrshanyń basyna shyǵýǵa buıryq bergenin aıtady. Semeıdegi bas shyrshany bezendirýge barlyǵy on mekteptiń muǵalimderi jumyldyrylǵan eken”, — deıdi KTK telearnasy.

Muǵalimniń áıeli qaǵaz júzinde bolmasa da, buıryq aýyzsha berilgeni anyq dep otyr. Endi tergeý aıaqtalǵan soń advokat jaldap, ótemaqy talap etý úshin sotqa júginbek.

“Biz barlyǵyn zań júzinde istep jatyrmyz. Qazir 362-baptyń tórtinshi tarmaǵy boıynsha qylmystyq is qozǵaldy. Tergeý júrip jatyr. Barlyǵynan suraq alynyp jatyr. Endi aldaǵy ýaqytta sot ádil ótedi degen sheshimdemiz. Tergeý qalaı bitedi, kimdi kináli qylady, biz solarǵa aryz jazyp, bárin sotpen sheshemiz”, – deıdi Symbat Aıanqyzy. 

Aıta keteıik, 9 qańtarda aýyr jaraqat alǵan semeılik muǵalim Qýat Aıtqalıevtyń aýrýhanadan shyqqany týraly jazǵan edik.

Oqý-aǵartý mınıstri Ǵanı Beısembaevtyń aıtýynsha, qazirgi ýaqytta muǵalimge ótemaqy tóleý máselesi qarastyrylyp jatyr.

Eske salaıyq, buǵan deıin Semeıde jańa jyldyq shyrshany bezendirý kezinde muǵalim bıikten qulap, aýyr jaraqat alǵan edi.

Oqý-aǵartý mınıstri Ǵanı Beısembaev Facebook-tegi paraqshasynda atalǵan oqıǵaǵa baılanysty oblys basshylyǵy ádil ári jan-jaqty tekserý júrgizý kerek ekenin aıtqan bolatyn.

«Semeı qalasynda muǵalimderdi jańajyldyq shyrshany bezendirýge tartý jáne áriptesimizdiń osy is barysynda jaraqat alýy — zań buzýshylyqtyń aıqyn kórinisi. Pedagogterdi kásibı mindetterine jatpaıtyn mundaı jumystarǵa tartý — «Pedagog mártebesi týraly» zańdy óreskel buzý dep sanaımyn. Bul oqıǵaǵa baılanysty oblys basshylyǵy ádil ári jan-jaqty tekserý júrgizip, aldaǵy ýaqytta mundaı keleńsizdikterdiń qaıtalanýyna jol bermeý úshin tıisti sharalar qabyldaıdy dep úmittenemin», — dep jazdy ol.