جاڭالىقتار
سەمەيدە جوعالىپ كەتكەن وقۋشى ءبىر تاۋلىكتەن كەيىن امان-ەسەن تابىلدى
فوتو: اباي وبلىسى پد
اباي وبلىسى پوليتسيا دەپارتامەنتى سەمەيدە بۇكىل قالا ءبىر تاۋلىكتەن استام ىزدەگەن بالا تابىلعانىن مالىمدەدى. بۇل تۋرالى Stan.kz اقپارات اگەنتتىگى حابارلايدى.
پوليتسيا دەپارتامەنتىنىڭ دەرەگىنشە, 19 شىلدەدە ءىز-ءتۇسسىز جوعالعان ءۇشىنشى سىنىپ وقۋشىسى امان-ەسەن تابىلدى. ونى پوليتسەيلەر, ەرىكتىلەر مەن قالا تۇرعىندارى ىزدەستىردى.
«ىزدەستىرۋ جۇمىستارى قاراۋسىز قالعان عيماراتتاردا دا, ويىن-ساۋىق ورىندارىندا دا جۇرگىزىلدى. جەدەل-ىزدەستىرۋ شارالارى بارىسىندا قۇقىق قورعاۋ ورگاندارى ۆوستوچنىي كەنتىنىڭ اۋدانىندا مەكتەپ وقۋشىسىن تاپتى», –دەپ حابارلادى پوليتسيا.
ءتارتىپ ساقشىلارى بالانى پوليتسيا بولىمىنە جەتكىزىپ, سۇحبات الدى. پسيحولوگتىڭ قاراۋىنان وتكەن بالا اتا-اناسىنا تاپسىرىلدى.
ەسكە سالايىق, بۇعان دەيىن 9 جاسار بالا ۇيدەن بەلگىسىز باعىتتا شىعىپ كەتىپ, جوعالىپ كەتكەنىن جازعان ەدىك. اباي وبلىسى پوليتسيا دەپارتامەنتى جوعالعانىنا ءبىراز ۋاقىت بولعان بالانى تابۋعا ات سالىسۋدى سۇرادى. جوعالعان بالانىڭ اتى-ءجونى مانەنوۆ ءالينۇر ەرلان ۇلى, تۋعان جىلى: 2015 جىلدىڭ 26 شىلدەسى.
