«سەن مەنى تازارتىپ الدىڭ»: روزا مۇقانوۆا مارقۇم جارىمەن وتكىزگەن ساتتەرىنەن سىر شەرتتى

جاقىندا جازۋشى, دراماتۋرگ اكىم تارازي 92 جاسىندا دۇنيە سالعان ەدى. ارتىندا قالعان جۇبايى روزا مۇقانوۆا مارقۇم جارىن ەسكە الىپ, بىرگە وتكىزگەن ساتتەرىنەن سىر شەرتتى, دەپ جازادى qandastar.kz

«سىزبەن سۇحبات قۇرۋ دا, سىرلاسۋ دا, بىرگە عۇمىر كەشۋ دە – ماعان اللانىڭ بەرگەن ەرەكشە سىيى ەدى. وتكەن شاقتا سويلەۋ وتە قيىن. قاتتى اعىنمەن  ۇشىپ كەلە جاتىپ, كوزىڭ بايلانىپ جارتاسقا سوعىلعانداي جارالى سەزىم. اۋەلگىدە ەت قىزۋمەن سوعىلىپ قالعانىڭدى جاسىرعانداي, ۇيالعانداي, وزگەگە بىلدىرتپەي ءوزىڭدى ءوزىڭ الداۋسىراتقانداي ابايلاپ, ابدىراپ كۇي كەشۋ… ءدال سونداي كوڭىل…  قازىر دە ەكەۋارا اڭگىمەمىزگە كوز جۇگىرتىپ وتىرمىن. وقىعان سايىن داۋىسىڭدى اپ-انىق ەستىپ وتىرامىن. بۇل داۋىستى تەك مەن عانا ەستيمىن», — دەپ جازادى روزا مۇقانوۆا.

سودان كەيىن ەكەۋارا وربىگەن ديالوگتى جاريالاعان:

اكىم تارازي: — سەن مەنى دوسىڭ رەتىڭدە ساقتاي الدىڭ, باعالاي الدىڭ. ۇيات بولسا دا ايتايىن, سەن مەنى تازارتىپ الدىڭ, التىندى,كۇمىستى تازارتقانداي.

روزا مۇقانوۆا: -دوس بولا ما?..

اكىم تارازي: — دوستىق  دەگەن رۋحاني ورتا. ول ورتادا سەنى جاقسى كورەتىندەر دە, جەك كورەتىندەر دە بولادى. رۋحاني ورتادا تەك تازا, تالانتتى ادامدار عانا بولمايدى. ءار ءتۇرلى ادام بولادى. بىرەۋ  تالانتتىڭ جانىندا جۇرگەندى ماقتان ەتەدى, بىرەۋى جاماندىق جاساۋ ءۇشىن دە بىرگە  جۇرەدى. مەن ساتقىندىق دەگەن ءسوزدى ايتقىم كەلمەيدى. ساتقىندىق – تالانتتى ادامعا قيىندىق اكەلەدى.  تالانتتاردىڭ تاعدىرى ۇنەمى قىل ۇستىندە تۇراتىنى سوندىقتان.  ويتكەنى ساتقىن – تالانتتىڭ جانىندا جۇرەدى.

روزا مۇقانوۆا: — جاقسى ادامسىڭ!

اكىم تارازي: — سولاي ما… جانىم-اۋ! جاقسى ادام ساناتىندا بولسام, ول مەنىڭ شىعارمالارىمنىڭ باعالانۋى. سولاي بولار…

روزا مۇقانوۆا: — كوكو,  بىرەۋ ەسىككە قوڭىراۋ شالدى,  مەن ەسىك اشايىن.

اكىم تارازي: — مىناۋىڭ دراماتۋرگيانىڭ دەتالى —  سيتۋاتسيا وزگەردى, باسقا ءبىر كەيىپكەر ارالاستى…

ءبىزدىڭ  عۇمىر وسىنداي ەدى…