سەنات دەپۋتاتى زاڭسىز كوشى-قوننىڭ ءوسۋ ماسەلەسىن كوتەردى

فوتو: اشىق دەرەككوز

سەنات دەپۋتاتى بيبىگۇل جەكسەنباي قازاقستانداعى زاڭسىز كوشى-قوننىڭ ءوسۋى ەلىمىزدەگى الەۋمەتتىك تۇراقتىلىق پەن قاۋىپسىزدىككە قاۋىپ توندىرەتىن باستى پروبلەمانىڭ بىرىنە اينالعانىن ايتادى, دەپ جازادى qandastar.kz

سەناتور دەپۋتاتتىق ساۋالىندا باس پروكۋراتۋرانىڭ دەرەكتەرىن كەلتىرىپ, ەلىمىزدىڭ زاڭدارىن بۇزعان شەتەلدىك ازاماتتاردىڭ سانى 2024 جىلى ەداۋىر وسكەنىن اتاپ ءوتتى. بيىلدىڭ وزىندە 82 مىڭنان استام ميگرانت اكىمشىلىك جاۋاپكەرشىلىككە تارتىلعان, ال 1,2 مىڭعا جۋىق جۇمىس بەرۋشى شەتەلدىك ەڭبەك كۇشىن زاڭسىز پايدالانعان ەكەن.

جالعان ەڭبەك شارتىن, مەديتسينالىق انىقتامالاردى جاساپ, زاڭسىز ەسەپكە قويعان حالىققا قىزمەت كورسەتۋ ورتالىقتارى مەن ەمدەۋ مەكەمەلەرىنىڭ قىزمەتكەرلەرى تۇراتىن قىلمىستىق توپ انىقتالعان. ەڭبەك جانە حالىقتى الەۋمەتتىك قورعاۋ مينيسترىلىگىنىڭ دەرەگى بويىنشا قازىر 13,2 مىڭ شەتەل ازاماتى رەسمي تۇردە جۇمىس ىستەيدى. ەڭبەك ميگرانتتارىنىڭ دەرلىگىندە جۇمىسقا شاقىرۋ رۇقسات قاعازى جوق. زاڭدى جانە زاڭسىز ميگرانتتاردىڭ جيناقتالۋى الەۋمەتتىك-ەكونوميكالىق عانا ەمەس, قاۋىپسىزدىك ماسەلەلەرىنىڭ تۋىنداۋىنا اكەلۋى مۇمكىن, – دەپ اتاپ ءوتتى دەپۋتات.

بيبيگۇل جەكسەنبايدىڭ پىكىرىنشە, جاھاندانۋ جانە كوشى-قون اعىندارى كۇشەيگەن جاعدايدا قازاقستانعا شەتەل ازاماتتارىنىڭ قوزعالىسىن باقىلاۋدى كۇشەيتۋ, ەڭبەك ميگرانتتارىن زاڭداستىرۋ جۇيەسىن دامىتۋ جانە زاڭسىز كوشى-قوندى مەن ەڭبەك رەسۋرسىن پايدالانۋدى ۇيىمداستىرۋشىلارعا جازانى قاتاڭداتۋ قاجەت.

شەكارادا قاتاڭ شارالار قولدانۋ, باقىلاۋدا يننوۆاتسيالىق تەحنولوگيا پايدالانۋ جانە ميگرانتتار اراسىندا حاباردارلىقتى ارتتىرۋدى كوزدەيتىن كەشەندى ءتاسىل عانا ءوسىپ كەلە جاتقان قاۋىپتى جەڭۋگە كومەكتەسەدى, دەپ سانايدى سەناتور. قازاقستان ءوزىنىڭ ەكونوميكالىق مۇددەسىن قورعاپ قانا قويماي, قوعامدا تۇراقتىلىقتى ساقتاپ, بارلىعىنا قاۋىپسىز جانە ادىلەتتى تۇردە جۇمىسقا ورنالاسۋدى قامتاماسىز ەتۋى ماڭىزدى, – دەدى بيبيگۇل جەكسەنباي.