جاڭالىقتار
سەنات نەسيە بەرۋدەگى تاۋەكەلدى ازايتۋ تۋرالى زاڭدى قارادى
ارتىق نەسيە الۋعا شەكتەۋ قويىپ, جۇبايىنىڭ كەلىسىمىنسىز كرەديت الۋعا تىيىم سالۋ.
بۇگىن «نەسيە بەرۋدەگى تاۋەكەلدەردى ازايتۋ تۋرالى زاڭ» سەناتتا ءبىرىنشى وقىلىمدا قارالدى. قۇجات قارىز الۋشىلاردىڭ قۇقىقتارىن قورعاۋ, قارجى نارىعىن رەتتەۋ جانە اتقارۋشىلىق ءىس جۇرگىزۋدى جەتىلدىرۋدى كوزدەيدى. جوبادا نەسيەسى 90 كۇننەن بەرى تولەنبەگەن ازاماتتارعا كرەديت بەرۋگە تىيىم سالۋ دا قاراستىرىلعان.
سونىمەن قاتار اسكەردە جۇرگەن بورىشكەرگە نەسيە تولەمدەرىن كەيىنگە قالدىرۋ مۇمكىندىگى بەرىلمەك. زاڭدا ازاماتتاردىڭ پروبلەمالىق بەرەشەگىن رەتتەۋدى ىنتالاندىراتىن تالاپتار دا بار. ماسەلەن, 2026 جىلعى 1 مامىرعا دەيىن بانكتەر مەن ميكروقارجى ۇيىمدارىنىڭ قارىزداردى كوللەكتورلارعا بەرۋىنە موراتوري ەنگىزىلەدى.
سونداي-اق بيومەتريالىق سايكەستەندىرۋسىز ەلەكتروندىق نەسيە بەرۋگە تىيىم سالىنۋ ۇسىنىلىپ وتىر. ايتا كەتەيىك, سەنات دەپۋتاتتارى, بىرقاتار تۇزەتۋمەن زاڭ جوباسىن, ماجىلىسكە قايتاردى.
