جاڭالىقتار
سەنات تۇركىستان قالاسىنا ەرەكشە مارتەبە بەرۋ تۋرالى زاڭدى ماقۇلدادى

فوتو: اشىق دەرەككوز
سەناتتىڭ كەزەكتى جالپى وتىرىسىندا سەناتورلار «تۇركىستان قالاسىنىڭ ەرەكشە مارتەبەسى تۋرالى» قازاقستان رەسپۋبليكاسىنىڭ زاڭىن ءبىرىنشى وقىلىمدا ماقۇلدادى. بۇل زاڭ تۇركىستان قالاسىنىڭ تاريحي جانە مادەني مۇراسىن ساقتاۋ مەن دامىتۋعا باعىتتالعان, — دەپ حابارلايدى qandastar.kz
زاڭعا سايكەس, تۇركىستان قالاسىنداعى تاريحي-مادەني ەسكەرتكىشتەردى, سونىڭ ىشىندە قوجا احمەت ياساۋي كەسەنەسىنىڭ قورعاۋ ايماقتارىندا ورنالاسقان نىسانداردى باسقارۋ, ساقتاۋ جانە ولاردىڭ تۇتاستىعىن قامتاماسىز ەتۋدىڭ ءتيىمدى جۇيەسىن قۇرۋ كوزدەلگەن.
سونىمەن قاتار زاڭدا مىناداي باعىتتار قاراستىرىلعان:
- قوجا احمەت ياساۋي كەسەنەسى مەن ونىڭ قورعاۋ ايماقتارىنداعى تاريحي جانە مادەني ەسكەرتكىشتەردە ارحەولوگيالىق جانە عىلىمي-رەستاۆراتسيالىق جۇمىستاردى جوسپارلاۋ جانە جۇرگىزۋ;
- تاريحي-مادەني مۇرانى ساقتاۋ, دامىتۋ, قايتا جاڭعىرتۋ جانە ۇلتتىق قولونەردى وركەندەتۋ;
- تۇركىستان قالاسىنداعى تاريحي-مادەني مۇرا نىساندارىن قورعاۋ جانە پايدالانۋ جونىندەگى شەشىمدەردى عىلىمي تۇرعىدان نەگىزدەۋ;
- تۇركىستان قالاسىنىڭ حالىقارالىق ىنتىماقتاستىعىن دامىتۋ.
زاڭدا تاريحي جانە مادەني ەسكەرتكىشتەردى قورعاۋ جونىندەگى نورمالار ناقتى كورسەتىلگەن. تۇركىستان قالاسىنىڭ ارحەولوگيالىق جانە ينفراقۇرىلىمدىق ەسكەرتكىشتەرىنە قاتىستى ەرەجەلەر دە بەلگىلەنگەن.
سەناتور سۇيىندىك الداشەۆتىڭ ايتۋىنشا, قۇرىلىس سالۋدى رەتتەۋ ايماعىندا جۇرگىزىلەتىن قۇرىلىس جۇمىستارى تاريح جانە مادەنيەت ەسكەرتكىشتەرىنىڭ ساۋلەتتىك كەلبەتىن بۇزباۋى ءتيىس. قوجا احمەت ياساۋي كەسەنەسىنىڭ بىرەگەيلىگىن ساقتاۋ ماقساتىندا, ونىڭ قورعاۋ ايماعىنىڭ شەكاراسىنان 100 مەتر قاشىقتىقتا بيىكتىگى 7 مەتردەن اساتىن, سونداي-اق كولەمى, ءتۇسى مەن قۇرىلىس ماتەريالدارى تاريحي-مادەني ەسكەرتكىشتەرمەن ۇيلەسپەيتىن نىسانداردىڭ سالىنۋىنا جول بەرىلمەيدى.