سەناتور مەكتەپ پسيحولوگتارىنىڭ جالاقىسى از ەكەنىن ايتتى

فوتو: ەگەمەن قازاقستان

سەناتور عالياسقار سارىباەۆ پرەمەر-مينيستر ولجاس بەكتەنوۆكە دەپۋتاتتىق ساۋال جولداپ, مەكتەپ پسيحولوگتارىنىڭ جالاقىسىن كوتەرۋدى ۇسىندى, – دەپ حابارلايدى bai-bol.kz.

ونىڭ ايۋتىنشا, بالالاردىڭ پسيحولوگيالىق جاعدايى مەن مىنەز-قۇلقىنداعى العاشقى پروبلەما مەكتەپكە دەيىن جانە مەكتەپ جاسىندا انىقتالادى. سوندىقتان پەداگوگ-پسيحولوگتار وقۋشىلارعا جەكە كومەك كورسەتۋ ءۇشىن كورسەتىلەتىن قىزمەتتىڭ ساپاسىن ارتتىرۋ ماسەلەسىن قاراستىرۋى كەرەك.

وقۋ-اعارتۋ ءمينيسترىنىڭ №224 بۇيرىعىنداعى نورماتيۆكە سايكەس, پسيحولوگتاردىڭ شتات سانى مەكتەپتەگى جالپى سىنىپ بويىنشا ەسەپتەلگەن. وسىعان سايكەس, كەز كەلگەن ءبىلىم بەرۋ مەكەمەسىندە پسيحولوگ شتاتتارى 0,5-تەن 2 بىرلىك اراسىندا قاراستىرىلعان. مىسالى, ورتاشا ەسەپپەن 1,5 مىڭ بالا وقيتىن مەكتەپتەردە 60, ال 4,5 مىڭ جانە ودان دا كوپ وقۋشى بار ءبىلىم بەرۋ وشاقتارىندا 170-تەن كوپ سىنىپ بار. ياعني, 1 پسيحولوگ 2 مىڭ وقۋشىعا جانە ەرەكشە ءبىلىم بەرۋ قاجەتتىگى بار بالالارعا قىزمەت كورسەتىپ جاتىر. پسيحولوگتىڭ ۇلكەن جۇكتەمەسى بولۋىنا بايلانىستى, ناقتى مۇقتاج ادامعا كومەك بەرىلمەيدى, – دەدى عالياسقار سارىباەۆ.

دەپۋتات ماسەلەنى شەشۋ ءۇشىن مەكتەپ پسيحولوگتارىنىڭ سانى جونىندەگى ءنورماتيۆتى قايتا قاراۋدى, سىنىپ سانىنا تۇزەتۋلەر ەنگىزۋدى, مامانداردىڭ جالاقىسىن كوتەرۋدى ۇسىندى.

1987 جىلى رەسمي تۇردە مەكتەپتەرگە پسيحولوگ شتاتتارى ەنگىزىلدى. الايدا ولاردىڭ زاڭدى مارتەبەسى انىقتالماعان. ەڭبەكاقى تولەۋ جۇيەسىندە ولار قوسىمشا ماماندىق رەتىندە انىقتالدى. پسيحولوگيا ەرەكشە ماماندىق ەكەنىن ەسكەرىپ, پسيحولوگتاردى نەگىزگى ماماندار تىزبەسىنە ەنگىزۋدى ويلاستىرۋ كەرەك, – دەدى سەناتور.

ەسكە سالا كەتسەك, بۇعان دەيىن

• بالالار ۇيىندەگى مۇعالىمدەردىڭ جالاقىسى ماردىمسىز ەكەنىن;
• سوت اۋدارماشىسى جالاقىسىنىڭ جول شىعىندارىن وتەۋگە جەتپەيتىنىن;
• ءورت ءسوندىرۋشى سەرجانتتاردىڭ 180-اق مىڭ تەڭگە جالاقى الاتىنىن;
• ەنەرگەتيكتەردىڭ جالاقىسىنا كوممۋنالدىق ءتاريفتى قىمباتتاتۋ ەسەبىنەن 30 مىڭ تەڭگە قوسىلعانىن;
• سانيتارلاردىڭ ايلىعى شايلىعىنا جەتپەيتىنىن جازعان بولاتىنبىز.