سەناتور: سولتۇستىك پەن شىعىستا حالىق سانى ازايعان

قازاقستاندا دەموگرافيالىق ساياسات فراگمەنتتى سيپاتتا قالىپ وتىر, ال ونى جۇزەگە اسىرۋدا جۇيەلىلىك پەن ۇيلەسىمدىلىك جەتىسپەيدى. بۇل تۋرالى سەنات وتىرىسىندا دەپۋتات امانگەلدى تولاميسوۆ ءوزىنىڭ دەپۋتاتتىق ساۋالىندا مالىمدەدى, دەپ حابارلايدى qandastar.kz

سەناتوردىڭ ايتۋىنشا, دەموگرافيا مەن كوشى-قوندى باسقارۋ فۋنكتسيالارى ءارتۇرلى مەملەكەتتىك ورگاندار اراسىندا شاشىراڭقى ورنالاسقان. بۇل جۇيەلى تالداۋ جۇرگىزۋگە جانە ناقتى جوسپار قۇرۋعا مۇمكىندىك بەرمەيدى. ونىڭ سالدارىنان ەلدە تۋ كورسەتكىشى تومەندەپ, حالىقتىڭ قارتايۋى, وڭىرلىك تەڭسىزدىك, اسىرەسە سولتۇستىك جانە شىعىس ايماقتارداعى حالىق سانىنىڭ ازايۋى, كوشى-قون اعىنىنىڭ ارتۋى جانە ۋربانيزاتسيانىڭ كۇشەيۋى بايقالىپ وتىر.

«قالىپتاسقان سىن-قاتەرلەردى جەكە باستامالارمەن ەڭسەرۋ مۇمكىن ەمەس. بۇل ماسەلەلەرگە عىلىمي نەگىزدەلگەن, ۆەدومستۆوارالىق ۇيلەستىرىلگەن, ءبىرتۇتاس كەشەندى كوزقاراس قاجەت», – دەدى تولاميسوۆ.

ونىڭ پىكىرىنشە, قازىرگى جاعدايدا بۇل سالاعا جاۋاپتى بىرىڭعاي ورتالىقتىڭ جوقتىعى وكىلەتتىكتەردىڭ ب ۇلىڭعىرلانۋىنا جانە باسقارۋدىڭ تيىمدىلىگىنىڭ تومەندەۋىنە سەبەپ بولىپ وتىر. وسىعان بايلانىستى سەناتور قولدانىستاعى مەملەكەتتىك ورگانداردىڭ بىرىنە دەموگرافيا مەن كوشى-قون سالاسىنداعى نەگىزگى ۇيلەستىرۋ فۋنكتسيالارىن زاڭنامالىق دەڭگەيدە بەكىتىپ بەرۋدى ۇسىندى.

سەناتور سونداي-اق دەموگرافيا سالاسىنداعى عىلىمي-تالداۋ جۇمىسىن دامىتۋ قاجەت ەكەنىن ايتتى. ونىڭ ىشىندە ۇلتتىق تالداۋ ورتالىعىن قۇرۋ – دەموگرافيالىق جانە كوشى-قون ۇدەرىستەرىن الەۋمەتتىك-ەكونوميكالىق فاكتورلارمەن بىرگە جان-جاقتى زەرتتەۋگە جانە مەملەكەتتىك ساياساتتى ءدال جوسپارلاۋعا مۇمكىندىك بەرمەك.

بۇعان قوسا, امانگەلدى تولاميسوۆ بۇل ستراتەگيانى ءتيىمدى جۇزەگە اسىرۋ ءۇشىن بىلىكتى كادرلاردى دايارلاۋ ماسەلەسىنە دە ەرەكشە نازار اۋداردى.