«Senderdi qarǵysqa ushyratam!»: Bekbolat Tileýhan Ǵarıfolla Qurmanǵalıevtiń nemeresin qarǵaǵan

Foto: ashyq derekkóz

Feısbýk jelisinde Serik Hasenov esimdi oqyrman Bekbolat Tileýhanov oryndaıtyn «Elim meniń» áni týraly tosyn jazba jarııalady, dep habarlaıdy qandastar.kz Alash.KZ-ke silteme jasap.

Hasenovtyń jazýyna qaraǵanda, Tileýhannyń ózim shyǵardym dep oryndap júrgen «Elim meniń» áni Qurmanǵalıevtiń áni kórinedi. Án týraly Qurmanǵalıevtiń nemeresi, óner ǵylymynyń kandıdaty Merýert Sanatqyzy málimdeme jasapty.

«Bekbolatpen konservatorııada birge oqydyq. Bizdiń úıge emin-erkin kirip, atamnyń arhıvin aqtaryp júretin. Biraq biz onyń aram oıy bar ekenin bilmedik. Ol sol kezde ánniń notasyn urlap alyp ketken eken. Keıin jubaıym ekeýmiz atamnyń mereıtoıyna oraı onyń arhıvin qarap otyrǵanda, osy ánge keziktik. Jubaıym dereý: «Oı, mynaý tanys án ǵoı» — dedi. Qarasaq, búginde Bekbolat oryndap júrgen «Elim meniń» degen án. Týra aına-qatesiz. Bul ándi Ǵarıfolla atam ertede shyǵaryp, oryndap, biraq halyqqa taratýǵa múmkinshiligi bolmasa kerek.

Osydan keıin Bekbolatqa bardyq. Ol bizdi tyńdamaq túgili, tipti mańaıyna jolatar emes. Ári-beriden soń, men seni tanymaımyn dep saldy maǵan. Tipti bolmaǵasyn: «Seniń qolyńda ne aqsha, ne bılik joq, ne isteı alasyń maǵan?!» — dep týrasyna kóshti. Bir kezde óz-ózinen duǵa oqyp, senderdi qarǵysqa ushyratam dep, maǵan: «Kózime qara, kózime qara!» — dep aıǵaılaı bastady. Osy sózdi jubaıyma da aıtyp edi, ol: «Men seniń kózińe qaraıtyn áıel emespin, basymdy aýyrtpa» — dedi.

Osydan soń biz ony sotqa berip edik, sot aryzymyzdy qabyldamady, sebebi ol sol kezde parlament depýtaty edi.
Tipti bolmaǵasyn men qaıta Bekbolatqa baryp: «Sen óziń bizdi sotqa bershi ótirik jala japty dep, sot sosyn aq-qarasyn aıyrsyn» — dep edim, ol at-tonyn ala qashty. Endi taǵy da sotqa berdik, biraq ol shetelde júr», — deıdi Merýert Sanatqyzy.