«سەندەرگە كىمگە كەرەكسىڭدەر»: اباي تەاترىنان 9 قىزمەتكەردى ءبىر كۇندە جۇمىستان شىعارعان

فوتو: Gatob.kz

اباي اتىنداعى قازاق ۇلتتىق وپەرا جانە بالەت تەاترى قىزمەتكەرلەرىن زاڭسىز جۇمىستان شىعارىپ جاتىر. سول تەاتردا كورەرمەنمەن جۇمىس جونىندەگى مەنەدجەر نازەركە ابىلقاسىموۆا الەۋمەتتىك جەلىدە وسىنداي دابىل كوتەردى, دەپ حابارلايدى Qaz365.kz.

قىزمەتكەرلەردىڭ جانايقايى

نازەركەنىڭ ايتۋىنشا, تەاتردان كىرگەن ادامدى قارسى الىپ, باعىت-باعدار كورسەتىپ, كورەرمەنگە ورنىن كورسەتەتىن قىزمەتكەرلەر – كاپەلدينەرلەر. سونىمەن بىرگە, كاپەلدينەرلەر تەاتردا تازارتۋ جۇمىستارىنا جاۋاپتى.

«1 شىلدەگە دەيىن تەاتردا 9 كاپەلدينەر جۇمىس ىستەگەن. سول كۇنى بۇكىل تەاتر ەڭبەك دەمالىسىنا كەتەدى. ءبىز 1 شىلدەدە ءبارىمىز دەمالىسقا شىعاتىنىمىز جونىندە ءوتىنىش جازۋعا كەلگەنبىز. بىراق تەاترعا كىرگەنىمىزدە ءبىزدى تەاتردىڭ كادر ءبولىمىنىڭ باستىعى قارسى الىپ, بەيرەسمي تۇردە ءبىزدىڭ ءبولىم تاراتىلىپ كەتكەنىن ايتتى. ياعني, ءبىزدى, 9 كاپەلدينەردى قىسقارتىپ جىبەرگەن. وسى جاڭالىقتى ەستىپ, نە دەرىمىزدى بىلمەي قالدىق», – دەيدى ول.

وسىدان كەيىن كادر ءبولىمىنىڭ باسشىسى قىزمەتكەرلەردىڭ قىسقارتىلۋىن تەاتردىڭ 90 جىلدىعىمەن بايلانىستىرىپ, ول ءىس-شاراعا ەل پرەزيدەنتى قاتىساتىنىن ايتقان.

«بىزگە, كاپەلدينەرلەرگە ءبىزدىڭ ديرەكتور اينۇر كوپباساروۆانىڭ سىرتقى ستاندارت بويىنشا تالابىنا ساي كەلمەيتىنىمىزدى ايتتى. زۋحرا نۇراحمەتقىزى (كادر ءبولىمىنىڭ باسشىسى) ءبىزدى تەاتردىڭ زاڭگەرى مۇحيت تاتەنوۆكە جولداپ, شتاتتىڭ قىسقارعانى جونىندە حابارلامامەن تانىستىرماق بولدى. ءبىز وعان بىرنەشە رەت باردىق. الايدا ول بىزگە بىردەڭەنى ءتۇسىندىرۋدىڭ ورنىنا ءوزىن دورەكى ۇستاپ, حابارلامانى كورسەتۋدەن باس تارتتى. ەڭبەك زاڭناماسىنا سايكەس, جۇمىس بەرۋشى كەمى ءبىر اي بۇرىن جۇمىستان بوساتاتىنىن ەسكەرتۋى كەرەك», – دەيدى ول.

نازەركە ابىلقاسىموۆا سونىمەن بىرگە تەاتر باسشىلىعى وسىنشالىقتى قىسقارتۋ بولاتىنىنى قانداي الەۋمەتتىك مەكەمەلەرگە ەسكەرتىلگەنى جونىندە حابارلامانى كورسەتپەي وتىرعانىن ايتادى. كاپەلدينەرلەر بۇل شەشىممەن كەلىسپەيتىنىن ايتقاندا, ۇلكەن قىسىمعا ۇشىراعان. ابىلقاسىموۆا كادر ءبولىمى باسشىسىنىڭ «وي, ۆووبششە نا حرەن منە ۆى نۋجنى» دەگەن ءسوزىنىڭ اۋديوسىن دا سالىپ كورسەتتى. ال تەاتردىڭ ەسەپشىسى «قاعازعا قول قويماعان جاعدايدا ارنايى باپپەن جۇمىس شىعارىلاتىنىن» ايتقان. كۇزەتشىگە تەاتر باسشىلىعى جۇمىستان بوساعان 9 قىزمەتكەردى 1 تامىزدان باستاپ تەاترعا كىرگىزبەۋدى تاپسىرعان.

كوپباساروۆا دەگەن كىم

تەاتر ديرەكتورى اينۇر كوپباساروۆانىڭ اتى بىرنەشە جىل بۇرىن تۇركىستان مۋزىكالىق دراما تەاترىن باسقارىپ تۇرعان كەزدە شىققان. كەزىندە «بورتە» سپەكتاكلىن ساحنالايمىن دەپ جۇرتشىلىق تاراپىنان سىنعا قالعان. ول باسقارعان «تۇركىستان مۋزىكالىق دراما تەاترى» مكقك جالپى سوماسى 246 ملن 750 مىڭ تەڭگە شىعىنداعان. بۇل جايلى زەرتتەۋ ماقالادا كوپباساروۆانىڭ «بورتەگە» بولىنگەن قاراجاتتىڭ ەسەبىن اشىپ ايتا الماعانىن جازىلعان بولاتىن.

اباي اتىنداعى ۇلتتىق اكادەميالىق وپەرا جانە بالەت تەاترىن اينۇر كوپباساروۆا وسى جىلدىڭ باسىنان باستاپ باسقارادى.