«سەنى زورلاعان جوق قوي, ءوز ەركىڭمەن بولدىڭ عوي». ادۆوكات تەرگەۋشىلەر انارۋعا قىسىم كورسەتكەنىن ايتتى

كوللاج: paryz.kz

بوكسشى جانقوش تۇراروۆتان زورلىق-زومبىلىق كوردىم دەگەن ءانارۋ قۇرمانالىنىڭ ادۆوكاتى ءلاززات احاتوۆا الەۋمەتتىك جەلىدەگى پاراقشاسىندا وسى ءىس جايلى تىڭ مالىمەت جازدى, دەپ حابارلايدى qandastar.kz Azattyq Rýhy سايتىنا سىلتەمە جاساپ.

«تاۋەلسىز ساراپتاما جاسالدى. قورىتىندى قولىمىزدا. ال تەرگەۋ تاعايىندانداعان ساراپتاما ءالى دايىن ەمەس. تەرگەۋشىنىڭ ءىس-ارەكەتىنە قىلمىستىق -پروتسەستىك كودەكستىڭ 105-بابىنا سايكەس, پروكۋراتۋراعا شاعىم تۇسىردىك. ءىس قازىر پروكۋراتۋرادا. اۋەزوۆ اۋداندىق پوليتسيا ءبولىمىنىڭ تەرگەۋشىسى د.ساعىمبەكوۆ 20-تامىز كۇنى ەكى تاراپتى بەتتەستىرۋ كەزىندە ورەسكەل پروتسەسسۋالدىق قاتەلىكتەرگە, ياعني زاڭسىزدىقتارعا جول بەرگەن. اتاپ ايتقاندا, جابىرلەنۋشىگە قۇقىقتارى, ياعني ادۆوكات الۋ قۇقىعى بار ەكەنىن ايتپاعان. ءتىپتى, بەتتەستىرۋ بولاتىنىن دا ەسكەرتپەي, «كەلىپ كەتىڭىز» دەپ شاقىرىپ العان. ال ەكىنشى تاراپ ەكى ادۆوكاتىمەن كەلگەن», — دەيدى ءلاززات احاتوۆا.

ونىڭ ايتۋىنشا, تەرگەۋشى تاراپىنان انارۋعا مورالدىق قىسىم جاسالعان.

«سوزدەرى مەن ارەكەتتەرىنەن تۇراروۆقا بولىسىپ, «سەنى زورلاعان جوق قوي, ءوز ەركىڭمەن بولدىڭ عوي» دەپ, قايتا-قايتا ايتىپ, سول ءسوزدى قوستىرعان. دەنە جاراقاتتارىن سوت-مەديتسينالىق ساراپشىسى لينەيكامەن ولشەپ, تەكسەرگەن. ال تەرگەۋشى دەنە جاراقاتتارىم جوق دەپ ايتقىزعان. حاتتاما سوڭىنداعى ءانارۋ جازعان قيسىق جازۋلاردان-اق قولدارى دىرىلدەپ, قىسىم ۇستىندە جازعان ادامنىڭ جازۋى ەكەنىن اڭعارۋ قيىن ەمەس. ودان وزگە, جابىرلەنۋشىگە 25 سۇراق, ال تۇراروۆقا 1-اق سۇراق قويعاندىعى, ارىزدانۋشىنىڭ ءار ءۋاجىن كۇدىكتىدەن سۇراپ, ناقتىلاماعانى, ونىڭ جاۋابىن تەكسەرمەگەنى دە تەرگەۋ امالىنىڭ بىرجاقتى وتكەنىن دالەلدەپ تۇر. بەتتەستىرۋدى بەينەتاسپاعا تۇسىرمەگەنى دە وسىنى ايعاقتاپ تۇر», — دەيدى ادۆوكات.

احاتوۆانىڭ ايتۋىنشا, وسى اتالعاندار نەگىزىندە 20-تامىز كۇنى وتكەن بەتتەستىرۋ حاتتاماسىن زاڭسىز دەپ تانىپ, كۇشىن جويىپ, قايتادان جابىرلەنۋشىنىڭ ادۆوكاتتارىنىڭ قاتىسۋىمەن بەتتەستىرۋ جانە قوسىمشا جاۋاپ الۋ تۋرالى تالاپ قويعان.

«ءانارۋدى قورعاۋشى تاراپقا تاعى ءبىر ادۆوكات قوسىلدى. ۇزاق جىلدار تەرگەۋ سالاسىندا ىستەگەن, الماتى قالالىق ادۆوكاتتار القاسىنىڭ مۇشەسى, بىلىكتى مامان ايلان ەسكەروۆ مىرزامەن بىرىگىپ, جۇمىس ىستەپ جاتىرمىز. تاعى دا كومەكتەسەمىز دەگەن قورعاۋشىلار از ەمەس. ازىرگە ەكى قورعاۋشىمەن شەكتەلىپ وتىرمىز. ءبىزدىڭ ەلدە ادىلدىك ورناماي, سىبايلاس جەمقورلىقتار ورىن السا, ادام, ايەل قۇقىعىن قورعايتىن حالىقارالىق ۇيىمدارمەن بىرلەسىپ, جۇمىس ىستەيمىز. پرەزيدەنتكە, پارلامەنت دەپۋتاتتارىنا ۇندەۋ جاسايمىز. المالى اۋداندىق پوليتسيا بولىمىنە ءانارۋدىڭ 2018 جىلى ج.تۇراروۆتىڭ ۇستىنەن زورلاۋ فاكتىسى ورىن العانى تۋرالى ارىزىن ارحيۆتەن كوتەرۋ تۋرالى ادۆوكاتتىق سۇراۋ جولداندى», — دەيدى ول.

ءلاززات احاتوۆانىڭ ايتۋىنشا, جەتىسۋ اۋداندىق پوليتسياسىنىڭ قىزمەتكەرى تاراپىنان ورىن العان ازاپتاۋ فاكتىسى بويىنشا ءا.قۇرمانالىنىڭ 2023 جىلعى جازعان ارىزى بويىنشا سۇراۋ جولدانعان.

«جاۋاپتارى ءالى كەلگەن جوق. قىسقاشا اتقارىلعان ءىس-شارالار جونىندە اقپارات وسى. قوعام ويانىپ كەلەدى. اۋەزوۆ جازعان قورعانسىزدىڭ كۇنى ءبىزدىڭ زاماندا وزەكتى ەكەنىنە ءانارۋ ءىسى دالەل. ءانارۋدىڭ تاعدىرى — كوپتەگەن قازاق قىزدارىنىڭ تاعدىرى, ىشتەرىندە تۇنشىعىپ جاتقان قايعى-مۇڭى. قازاق ازاماتى قارىنداستىڭ ارى ءۇشىن اتقا قونىپ, جاۋعا دا شاپقان زامان ارتتا قالسا كەرەك. اعا دەپ العاۋسىز, تازا كوڭىلمەن سەنگەن ەركەكسىماقتاردىڭ كوپشىلىگىنىڭ (بارىنە توپىراق شاشپايمىن, قازاقتا ازامات اتىنا لايىق ەرلەر كوپ) بەت-بەينەسى-جانقوش ىسپەتتەس. بۇل ءىس قوعامنىڭ جارىلۋعا شاق تۇرعان ءىرىڭىن اشقانداي بولدى. قولداۋلارىڭىزعا مىڭ العىس. قانشا تەلەارنالاردان, باق-تاردان حابارلاسىپ, اقپاراتتىق قولداۋ كورسەتۋگە دايىنبىز دەپ جاتقان جۋرناليستەر قاۋىمىنا, قىز تاعدىرىنا بەي-جاي قارامايتىن بارشا جاناشىر جاندارعا مىڭ-ميلليون العىس», — دەيدى ءلاززات احاتوۆا.

ەستەرىڭىزگە سالايىق, تانىمال بوكسشى جانقوش تۇراروۆ مەنى زورلادى دەپ ارىز جازعان ءانارۋ قۇرماناليەۆا Azattyq Rýhy رەداكتسياسىن سۇحباتتاسۋعا شاقىرىپ, بوكسشىنى نەشە جىلدان بەرى بىلەتىنىن, ونىمەن العاش رەت قالاي تانىسقانىن جانە جانقوش تۇراروۆ 6 جىلدان بەرى نە دەپ الداپ كەلە جاتقانىن ايتىپ بەرگەن ەدى.

21 تامىزدا الەۋمەتتىك جەلىدە تانىمال بوكسشى جانقوش تۇراروۆ ءانارۋ قالدىبەكتى زورلادى دەگەن اقپارات تارادى. الماتى قالاسىنىڭ پوليتسياسى مۇنى راستاپ, قىلمىستىق ءىس قوزعالعانىن مالىمدەدى.  وسىدان كەيىن ءانارۋدى ءبىر اي بۇرىن بەلگىسىز بىرەۋلەر قوناەۆ قالاسىندا زورلاعانى تۋرالى قاۋەسەت تارادى. وقيعا ءتورتىنشى شىلدە كۇنى بولعان. قىز پوليتسياعا ءوزى ارىزدانعان.