جاڭالىقتار
سەنساتسيالىق ۆيدەو: 310 ادام قازا تاپقان ۇشاقتىڭ نە سەبەپتى قۇلاعانى بەلگىلى بولدى
Air India اۋە كومپانياسىنىڭ Boeing 787 ۇشاعىنىڭ نە سەبەپتى اپاتقا ۇشىراعانى بەلگىلى بولدى. جاڭا سەنساتسيالىق بەينەجازبا اپاتتىڭ سەبەبى رەتىندە ۇشاقتىڭ ەلەكترمەن جابدىقتالۋىنىڭ ىستەن شىعۋىن دالەلدەپ بەرگەن, دەپ حابارلايدى qandastar.kz Skifnews.kz اقپارات پورتالىنا سىلتەمە جاساپ.
ازاماتتىق اۋە كومپانياسىنىڭ ۇشقىشى, اپاتتار مەن قاۋىپتى جاعدايلاردى زەرتتەيتىن ساراپشى ستيۆ شرايبەر جاڭا جانە ايقىنىراق بەينەجازبادا اپاتقا ۇشىراعان ۇشاقتىڭ ەكى قوزعالتقىشى دا ىستەن شىققانىن, سودان كەيىن ۇشاق اپاتقا ۇشىراعانىن ايتتى.
بۇل وقيعا ءۇندىستان تاريحىنداعى ەڭ اۋىر اۋە اپاتتارىنىڭ بىرىنە اينالدى. لوندونعا باعىت العان 787 Dreamliner ۇشاعى ۇشىپ شىققاننان كەيىن بىرنەشە مينۋت ىشىندە بيىكتىگىن جوعالتىپ, گۋدجارات شتاتىنىڭ احماداباد قالاسىنداعى تۇرعىن اۋداننىڭ ۇستىندە جارىلىپ كەتتى.
ۇشاقتاعى 242 جولاۋشىنىڭ 241-ءى كوز جۇمدى, امان قالعان تەك ءبىر ادام.
سونىمەن قاتار, جەردەگى 38 ادام ۇشاق تۇرعىن ۇيلەرگە سوعىلعاندا قازا تاپتى.
باستاپقىدا ينتەرنەتتە Captain Steeeve لاقاپ اتىمەن تانىمال شرايبەر اپاتقا ەكىنشى ۇشقىشتىڭ ءشاسسيدى ەرتە جيناپ قويۋىنا بايلانىستى قاراپايىم قاتەلىك سەبەپ بولدى دەپ بولجاعان. الايدا كەيىنىرەك پايدا بولعان ساپالى ءارى تولىق بەينەماتەريال ونىڭ بۇل بولجامىن وزگەرتكەن.
جاڭا بەينەجازبادا بەينە مەن دىبىس ساپاسى جوعارى, جانە شرايبەردىڭ ايتۋىنشا, ەكى قوزعالتقىشتىڭ ىستەن شىعۋى ۇشاقتىڭ اپاتقا ۇشىراۋىنا نەگىزگى سەبەپ بولعانىن دالەلدەيدى.
26 جىلدىق ۇشۋ تاجىريبەسى بار, سونىڭ ىشىندە 11 جىل كاپيتان بولعان, 60-تان استام ءتۇرلى ۇشاقتا ۇشقان 63 جاستاعى شرايبەردىڭ ايتۋىنشا, جاڭا بەينەجازبادا كورىنەتىن كىشكەنە ءبىر دەتال – بۇكىل وقيعانىڭ ماعىناسىن وزگەرتەدى.
YouTube-ارناسىندا (Captain Steeeve) ول بىلاي دەپ ءتۇسىندىردى:
«ۇشاقتىڭ وڭ جاق قاناتىنىڭ استىنان كىشكەنتاي شىعىندى — «قۇرساقتاعى دوڭەستى» كوردىم. ونىڭ استىندا «كىشكەنتاي سۇر نۇكتە» بار.
بۇل نۇكتە ۇشاقتاعى Ram Air Turbine (RAT) — اۆاريالىق تۋربينا جۇيەسىنىڭ ىسكە قوسىلعانىن بىلدىرەدى», — دەيدى ول.
«ول كوپتەگەن ۇشاقتاردا بار», — دەدى شرايبەر.
«ول ۇشاقتىڭ وڭ جاعىنداعى قاناتتان ءسال كەيىن ورنالاسقان. ونى ارنايى ەسىك جاپقىش جاۋىپ تۇرادى.
سىرت كەلبەتى — كىشكەنتاي ەكى قالاقتى موتور سياقتى. ماقساتى – شۇعىل جاعدايدا ۇشاققا ەلەكتر قۋاتى مەن گيدراۆليكالىق قىسىم بەرۋ».
شرايبەردىڭ ايتۋىنشا, 787 ۇشاعىندا RAT جۇيەسى ءۇش جاعدايدا اۆتوماتتى تۇردە ىسكە قوسىلادى:
- ەلەكتر جۇيەسىنىڭ اۋقىمدى ىستەن شىعۋى,
- گيدراۆليكالىق جۇيەنىڭ ىستەن شىعۋى,
- ەكى قوزعالتقىشتىڭ دا توقتاپ قالۋى.
«وسى ءۇش سەبەپتىڭ كەز كەلگەنى RAT-تى ىسكە قوسادى», — دەيدى ساراپشى.
