سەربيا پرەزيدەنتى مىنگەن ۇشاق باكۋگە شۇعىل قوندى

سەربيا پرەزيدەنتى الەكساندر ۆۋچيچ مىنگەن ۇشاق باكۋگە ءماجبۇرلى تۇردە قوندى, دەپ حابارلايدى qandastar.kz

Minval باسىلىمىنىڭ مالىمەتىنشە, ماسكەۋگە ۇشىپ بارا جاتقان سەربيا پرەزيدەنتىنىڭ ۇشاعى ۋكراينا دروندارىنىڭ رەسەي ايماقتارىنا جاساعان شابۋىلىنا بايلانىستى باكۋگە قوندى.

حابارلامادا پرەزيدەنتتىڭ ۇشاعى اۋە كەڭىستىگىندەگى قاۋىپسىزدىككە بايلانىستى رەسەي اۋماعىنا قاراي ۇشۋدى جالعاستىرا الماعانى ايتىلعان. شيەلەنىستى ەسكەرە وتىرىپ, ماسكەۋگە باعىتتالعان رەيس قاۋىپسىز ەمەس دەپ تانىلىپ, پرەزيدەنت دەلەگاتسياسى ازەربايجان استاناسى باكۋدە قالۋعا ءماجبۇر بولدى.

كەيىنىرەك ريا اگەنتتىگى حابارلاعانداي, سەربيا پرەزيدەنتىنىڭ ۇشاعىنا ۇشۋعا رۇقسات بەرىلىپ, ول باكۋدەن ماسكەۋگە قايتا اتتانعان.

Skifnews.kzاقپارات پورتالى جازعانداي,    ۆۋچيچ ماسكەۋگە جەڭىستىڭ 80 جىلدىعىنا ارنالعان مەرەكەلىك شارالارعا قاتىسۋ ءۇشىن باردى. سەرب كوشباسشىسى قىزىل الاڭداعى جەڭىس پارادىنا قاتىسىپ, رەسەي پرەزيدەنتى ۆلاديمير پۋتينمەن كەزدەسپەك.

بۇعان دەيىن لاتۆيا مەن ليتۆا بيلىگى ءۆۋچيچتىڭ ۇشاعىنا وزدەرىنىڭ اۋە كەڭىستىگى ارقىلى ۇشۋعا تىيىم سالعان بولاتىن. ال ەۋروپالىق وداق ۇمىتكەر ەلدەردىڭ جانە مۇشە مەملەكەتتەردىڭ باسشىلارىن ماسكەۋگە بارماۋعا شاقىرعان.

وسىعان جاۋاپ رەتىندە ۆۋچيچ پۋتينگە جەڭىس كۇنىنە ماسكەۋگە كەلەمىن دەپ ۋادە بەرگەنىن, سوندىقتان مىندەتتى تۇردە كەلەتىنىن, بىراق ۇكىمەت پەن ارميا وكىلدەرىن ەرتپەيتىنىن, سەبەبى ولار سانكتسياعا ۇشىراپ قالماۋى ءتيىس ەكەنىن ايتقان.