«Sergek» jol belgisin elemeıtin júk kólikterine avtomatty túrde aıyppul salady

Elordada úshinshi jolaqqa shyǵyp alatyn júk kólikteriniń júrgizýshilerine ákimshilik aıyppul salynady, dep habarlaıdy QazAqparat qalalyq Polıııa departamentiniń Facebook-tegi paraqshasyna silteme jasap.
Nur-Sultan qalasy Jergilikti polıııasynyń Ákimshilik polıııa basqarmasynyń eskertýinshe, «Sergek» sertıfıkattalǵan quraly kólik júrgizýshileriniń jol belgileri elemeı, erejeni buzǵanyn anyqtaıdy.
«Jol qozǵalysy erejelerine sáıkes artyq júk tıeýge baılanysty jıi qaýip tóndiretin kóp júk tasıtyn kólik quraldary júrgizýshileriniń ekinshi jolaqtan (úsh jáne odan da kóp jolaqty qozǵalysty eskere otyryp) odan ári ótýge quqyǵy joq. Atalǵan tártipti buzǵany úshin kóp júk tasıtyn kólik júrgizýshilerine ákimshilik aıyppul tóleý týraly nusqamalar joldanatyn bolady», – delingen habarlamada.
Aıta keterligi, úshinshi jolaqqa tek burylý nemese solǵa burylyp, keri baǵytqa qaıtý úshin shyǵatyn júk kólikterine ruqsat etilgen. Osy talapty saqtamaǵan kólikti «Sergek» kameralary avtomatty túrde anyqtaıdy, júrgizýshige Ákimshilik quqyq buzýshylyq týraly kodekstiń 601-baby, 1-bóligi boıynsha 3 AEK mólsherinde aıyppul salynǵany jóninde qujat jiberiledi.
Eske sala ketsek, buǵan deıin Nur-Sultan qalasynyń ákimdiginde ótken elordany damytý máseleleri jónindegi májiliste «Sergek» jobasy qoǵamdyq qaýipsizdikti arttyrý úshin tolyq kólemde paıdalanylmaı otyrǵany aıtylǵan bolatyn.