Serik Jumanǵarın baılarǵa qandaı jaǵdaıda salyq salynatynyn aıtty.

Foto:Úkimet

Vıe-premer jýrnalısterdiń “nege ortaq salyq retinde engizbeı, jekeleı bólip qarastyrdyńyzdar” degen suraǵyna da jaýap berdi, dep habarlaıdy qandastar.kz

Jýrnalıster qaýymy Jumanǵarınge  «sán-saltanat salyǵyn kóterile me» degen suraq joldaǵan bolatyn.

Eń aldymen “lıýks” uǵymyn durys anyqtap alýymyz kerek. Eger qazirgi tańda salyq salynǵaly jatqan dúnıelerge qarasaq, bul da sol qymbat, ıaǵnı sán-saltanattyń ózi emes pe? Máselen, eger sizdiń ıeligińizdegi barlyq jyljymaıtyn múliktiń jalpy quny 450 mıllıon teńgeden assa, demek salyq tóleısiz. Qatelespesem, bazalyq mólsherleme jylyna 3 mıllıon teńge, ári qaraı osy somadan asqan somaǵa 2 paıyz qosymsha tólenedi. Sol sııaqty, eger kólik quny 75 mıllıon teńgeden assa, joǵary mólsherleme boıynsha salyq salynady. Qymbat alkogol, qymbat shylymdar – osylarǵa da salyq salynady, – dedi Serik Jumanǵarın.

Sondaı-aq mınıstr  salyq salý barysynda asa muqııat bolý qajettigin atap ótti.

Eger erteń ne nárse sán-saltanatqa jatyp, ne jatpaıtyny anyq bolmasa – keıbir adamdar zardap shegýi múmkin. Munda “kináli” nemese “kinásiz” degen joq, biraq salyqty tıisti adamǵa emes, basqaǵa salyp qoıýymyz múmkin, – dedi Serik Maqashuly.