سەرىك جۇمانعارين قوسىمشا قۇن سالىعىنا قاتىستى نە ايتتى?

فوتو: اقوردا

پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين ۇكىمەتتىڭ كەڭەيتىلگەن وتىرىسىنان كەيىن وتكەن ءباسپاسوز ءماسليحاتىندا مەملەكەتتىڭ ققس مولشەرلەمەسىن كوتەرۋ جوسپارىنا تۇسىنىكتەمە بەردى, دەپ جازدى qandastar.kz

– قازىر باق-تا قوسىلعان قۇن سالىعىنىڭ مولشەرلەمەسىن بىردەن 20 پايىزعا كوتەرەدى ەكەن دەگەن اقپارات تاراپ جاتىر. 20 پايىز دەگەن – الەمدە ەڭ كوپ تارالعان مولشەرلەمە. ءبىز ۇكىمەت رەتىندە ازىرگە ناقتى مولشەرلەمەنى ءالى ناقتى ايقىنداعان جوقپىز. شىنىمدى ايتىپ وتىرمىن. نەگە? ويتكەنى ءبىز بيزنەسمەندەرمەن, قاۋىمداستىقتارمەن ءتۇرلى كونسۋلتاتسيالار جۇرگىزىپ جاتقانىمىزعا ءبىر اي بولىپ قالدى. «اتامەكەن» ۇلتتىق كاسىپكەرلەر پالاتاسىنىڭ الاڭدارىندا كەزدەسۋلەر وتكىزىپ ءجۇرمىز. بىزدە بىرقاتار كونسۋلتانتتار, جەتەكشى ەكونوميستەر, سالىق ماماندارى بار. ولار دا ءتۇرلى ەسەپتەر, سترەسس-سىناقتار جۇرگىزىپ جاتىر, – دەدى ۆيتسە-پرەمەر.

دەگەنمەن, ۇكىمەت بۇل باعىتتا بىرنەشە ستسەناري دايىنداپ وتىرعان كورىنەدى.

– ءبىز ۇلتتىق بانكتىڭ ماكروەكونوميكالىق مودەلىنىڭ نەگىزىندە بىرنەشە ەسەپتەۋلەر جاسادىق. بىراق ۇكىمەت تۇپكىلىكتى شەشىم شىعاردى دەپ ايتۋعا ەرتە. ءبىز ققس-ءتى كوتەرۋ كەرەك دەپ وتىرمىز. رەفورما كەرەك. جالپى مەملەكەت باسشىسى بۇگىن بۇل تۇرعىدا ءبىزدى قولدادى. ءبىز بۇرىنعى شارتتارمەن ءومىر سۇرە المايمىز. ويتكەنى قازىر زاڭنامانىڭ «ارقاسىندا» كاسىپكەرلەردىڭ كوبىنە سالىق مولشەرىن قىسقارتۋعا مۇمكىندىك بەرەتىن رەسمي ساڭىلاۋلار پايدا بولعان. مەملەكەت الەۋمەتتىك مىندەتتەمە, ەلدىڭ قورعانىس قابىلەتىن ارتتىرۋ سياقتى ءوز فۋنكتسيالارىن اتقارۋى كەرەك. ەگەر سالىق جيناماسا, ۇكىمەت ول فۋنكتسيالاردى قالاي ورىندايدى? بۇل داۋسىز ماسەلە دەپ ويلايمىن, – دەدى سەرىك جۇمانعارين.

ونىڭ پايىمداۋىنشا, ققس-تىڭ ءمانى بۇرمالانىپ وتىر جانە بۇل بۇرىنعى جىلدارى جۇرگىزىلگەن سالىق رەفورمالارىنىڭ سالدارى.