ءبىلىم
«سەرپىن» ارقىلى تەك قانا 5 وبلىستىڭ اۋىل بالالارى گرانتقا تۇسە الادى
فوتو: Pixabay
استانا. KAZINFORM — ۇلتتىق تەستىلەۋ ورتالىعى «سەرپىن» باعدارلاماسى اياسىندا گرانتپەن ءبىلىم الۋ جايىندا اقپارات جاريالادى.
«سەرپىن» جوباسىنىڭ باستى ماقساتى — ەلىمىزدىڭ وڭتۇستىك وڭىرلەرىنىڭ جاستارىن كادر تاپشىلىعىن كورىپ وتىرعان ايماقتاردا وقىتىپ, بىلىكتى ماماندار دايارلاۋ.
«سەرپىن» باعدارلاماسىنا مىنا ايماقتاردىڭ تۇلەكتەرى قاتىسا الادى: تۇركىستان, قىزىلوردا, جامبىل, الماتى جانە جەتىسۋ وبلىستارى.
ەسكە سالا كەتەيىك, باعدارلاما تەك اۋىل تۇلەكتەرىنە ارنالعان.
گرانتتار مىناداي وبلىستاردا ورنالاسقان جوو-لارعا ءبولىندى: سولتۇستىك قازاقستان, اقمولا, شىعىس قازاقستان, اباي, پاۆلودار, ۇلىتاۋ, قاراعاندى, قوستاناي وبلىستارى.
گرانتتار تەك پەداگوگيكالىق, IT جانە تەحنيكالىق, اۋىل شارۋاشىلىق ماماندىقتارىنا بەرىلەدى.
بيىل «سەرپىن» باعدارلاماسىنا مەملەكەتتەن 3 903 گرانت ءبولىنىپ وتىر.
ونىڭ 2500-دەن استامى پەداگوگيكالىق باعىتتا, 700-گە جۋىعى ينجەنەريا, وڭدەۋ جانە قۇرىلىس سالاسىنا, ال 300-گە جۋىعى IT-گە, 70-كە جۋىق گرانت اۋىل شارۋاشىلىعى جانە بيورەسۋرستار باعىتىنا بولىنگەن.
جوبا بويىنشا گرانتقا تۇسكەن تۇلەكتەر شاكىرتاقى الادى جانە جاتاقحانامەن قامتاماسىز ەتىلەدى.
«سەرپىن» باعدارلاماسى تۇلەكتەرى ءۇشىن وقۋ اياقتاعان سوڭ گرانت وتەۋ مەرزىمى 3 جىلدان 2 جىلعا قىسقارتىلىپ, وتەۋ ورنى 11 ايماققا ۇلعايتىلدى.
