Foto: ashyq derekkóz

Jyl saıyn tamyzda Almatyda páter baǵasy birneshe esege ósedi. Bıylǵy jaǵdaı qandaı? Massaget.kz tilshisi qazirgi ahýalǵa sholý jasap, sarapshymen suhbattasty.

Shildeniń aıaǵynda baǵa qandaı edi?

Baǵa qalaı ózgeretinin anyqtaý maqsatynda ótken aıda tanymal saıttardyń birine sholý jasadyq. Joǵary oqý oryndaryna jaqyn nemese jetý ońaı, qaýipsiz shaǵynaýdandardaǵy páterlerge basymdyq berildi.

Aıta keteıik, baǵasy 60 myń teńgeden bastalatyn páterler de tabyldy. Degenmen mundaı páterlerdiń jaǵdaıy tym nashar nemese tym alysta ornalasqan.

Naýryzbaı, Alataý, Túrksib aýdanynda ornalasqan páterler 150 myń teńge shamasyna baǵalanǵan.

Qaladaǵy beldi joǵary oqý oryndaryna jaqyn ornalasqan arzan páterler baıqaldy, degenmen burynǵy jataqhanalarda ornalasqan. Mundaı jaǵdaı Áýezov aýdanyndaǵy páterlerge de qatysty.

Almatylyq stýdentter kóbine Bostandyq, Almaly, Áýezov aýdandarynan páter jaldaǵandy qup kóredi, oǵan qosa birneshe adam birigip jaldaıtynyn eskergende, ádette 2 bólmeli páterler suranysqa ıe. Sonymen shildede baǵa mynadaı boldy:

• Bostandyq aýdanynda 180 myń teńge, 200, 210, 220 myń teńge, 480-500 myń teńge arasynda ózgergen;
• Almaly aýdanynda 150, 230-270, 450-500 myń teńge arasynda ózgergen;
• Áýezov aýdanynda 170, 230, 495 myń teńge arasynda ózgergen.

Qazirgi baǵa qandaı?

Qazirgi páter baǵalaryna qatysty da tanymal saıtqa sholý jasadyq. Negizgi kózdegenimiz – Almaly, Áýezov, Bostandyq aýdandaryndaǵy páterler.

• Almaly aýdanynda eń arzan baǵa – 65 myń teńge.

Páterdiń aýdanyn, jaǵdaıyn eskergende, mundaı baǵadaǵy páterler stýdentterge qolaısyz ekeni túsinikti.

«О́kinishke qaraı, baǵa tek ósip jatyr» – sarapshy

7 jyldan asa ýaqyt turǵyn úı salasynda jalǵa alý, jalǵa berý, jyljymaıtyn múlikti satý-satyp alý qyzmetterin kórsetip júrgen bilikti maman Shynar Alashbaeva Almatyda qazir páter baǵasy qandaı ekenin aıtty.

«О́tken jyldarmen salystyrǵanda aıtarlyqtaı ósti. Baǵa eshqashan túsken joq. Tek jyl saıyn qymbattap jatyr. Jurt baǵa túsedi dep kútedi, ókinishke qaraı, suranys ta joǵary, baǵa da joǵary. Bul qalanyń aýdandaryna da baılanysty. Mysaly, Áýezov aýdanyndaǵy 1 bólmeli páterler 150 myń teńgeden bastalyp 250 myń teńgege deıin jetedi. Ortalyqtan, Almaly, Bostandyq, Medeý aýdandarynan alatyn bolsaq, 1 bólmeli páterlerdiń baǵasy 200 myń teńgeden asady. Keıde 450 myń teńge deıin jetedi. Al shet aýdandardan 120, 130 myń teńgege tabýǵa bolady. Shet jaqtarda ýaqytsha úıler, jataqhana tıptes úılerden bólmeler tabylady. Olardyń baǵasy arzanyraq, 60-80 myń teńge arasynda. 2-3 bólmeli páterlerdiń quny da aýdandarǵa baılanysty. Ortasha 350-400 myń teńgeden bastalady. Eń qymbat turǵyn úı keshenderinde baǵa 1 mıllıon teńgeden asady», – dedi sarapshy.

Maman Almatyda Almaly, Bostandyq, Medeý aýdandary negizinen suranysqa ıe ekenin, degenmen keıingi kezde Áýezov aýdany da bul qatarǵa qosylyp kele jatqanyn jetkizdi. О́ıtkeni aýdan aýmaǵynan metro ótedi jáne qoǵamdyq kólikter jaqsy júredi.

Sarapshy páter baǵasy ósýine qandaı faktorlar áser etetinin atady.

«О́mir súrý quny qymbattaýy páter baǵasyna da áserin tıgizbeı qoımaıdy. Eń mańyzdysy – ınfraqurylym men qoǵamdyq kóliktiń jaqyn jerden júrýi. Dúken, oqý oryndary, mektepter, balabaqshalar jaqyn bolýyna baılanysty suranysqa ıe ortalyq aýdandarda baǵa joǵary. Úıdiń jaǵdaıyna da baılanysty. Sharshy metri úlken, jóndeý jumystary jaqsy jasalǵan bolsa, qymbat bolady», – dep túsindirdi ol.

Páter jaldaıtyndarǵa mamannan birer keńes:

• Qalanyń aýdandaryn, naryqty zertteý kerek;
• Qoǵamdyq kólik jaqsy júretin aýdandardy tańdaý qajet;
• Jalǵa alynatyn páterdiń jaǵdaıyna, ornalasqan jerine nazar aýdarǵan jón;
• Kúzde páter baǵasy ósetinin eskerińiz;
• Páterdi kórmeı, qujattaryn teksermeı, aqsha aýdarmaý kerek;
• Kelisimshartqa, sonyń ishinde uzaq merzimge kelisimshartqa otyrǵan durys.

Aıta keteıik, buǵan deıin Ǵylym jáne joǵary bilim mınıstrligi 104 joǵary oqý ornynda 93 367 oryndyq 264 jataqhana bar ekenin, degenmen áli de 19 174 oryn jetpeıtinin málimdegen edi.

Eske salaıyq, byltyr da Almaty men Astanadaǵy páter jaldaý baǵasy týraly arnaıy materıal ázirlegen edik.