«شاھار شوگىپ كەتە مە»: كەنتاۋ تۇرعىندارى تۇرعىن ۇيلەرگە قاۋىپ ءتونىپ تۇرعانىن ايتىپ, دابىل قاقتى

 فوتو: Almaty.tv

كەنتاۋدا جەر استى سۋلارى كوتەرىلىپ, تۇرعىن ۇيلەرگە قاۋىپ تونە باستادى. ءتىپتى پاتەرلەر قابىرعاسىنداعى جارىعى كۇن ساناپ ۇلكەيىپ بارادى. جەرگىلىكتى تۇرعىندار ماسەلە جاقىن ارادا شەشىلمەسە, ءۇيىندىنىڭ استىندا قالامىز با دەپ قورقادى, دەپ حابارلايدى qandastar.kz

كەندى شاھار تۇرعىندارى كۇندىز كۇلكىدەن, تۇندە ۇيقىدان ايىرىلعان. سەبەبى پاتەرلەردىڭ قابىرعالارى مەن جوعارعى بولىگى جارىلىپ جاتىر. جۇرت جەرتولەگە تولىپ قالا بەرەتىن سۋدى قانشا رەت تازالاتقانمەن, پايدا جوق. سەبەبى جەر استى سۋى قايتا-قايتا كوتەرىلىپ كەتە بەرەتىن كورىنەدى.

«2020 جىلى ەكولوگيالىق جوبا قاراستىرىلدى. اۋىز سۋ, جەر استى سۋى ينستيتۋت قىزمەتكەرلەرى, ارنايى ورگاندار قاتىستى. زەرتتەۋ جۇمىسىن جۇرگىزىپ, قالا  سۋعا شوگەتىنى ايتىلدى», – دەدى كەنتاۋ قالاسىنىڭ تۇرعىنى باقتيار عافۋروۆ.

Almaty.tv جازعانداي, جەرگىلىكتى بيلىك ماسەلەنى شەشۋ ءۇشىن تۇرعىن ءۇيدىڭ ءدال جانىنان ارنايى قۇدىق قازعان. الايدا تۇرعىندار «جاعدايدى ودان دا ۋشىقتىرىپ جىبەردى» دەيدى. سەبەبى كوكتەم سايىن جەرتولە سۋعا تولىپ قالا بەرەدى.

«ىرگەمىزدەن قۇدىق قازدى. اسفالتتەن ارى 800 مەتر قاشىقتىقتاعى نارسەنى ءۇيدىڭ ءدال جانىنا قۇدىق قازىپ, 300 مەتر تەرەڭنەن سۋ شىعاردى», – دەدى كەنتاۋ قالاسىنىڭ تۇرعىنى داستان ايتپەنوۆ.

تەلەارنانىڭ مالىمەتىنشە, كەنتاۋدا جەر استى سۋى 2004 جىلدان بەرى قاۋىپ ءتوندىرىپ كەلەدى. جاۋاپتىلار ۇيلەرگە قانشالىقتى زاقىم كەلگەنىن ارنايى تەكسەرىستەن كەيىن عانا ايتادى.

«جەر استى سۋىنىڭ جارىلۋىن بىردەن كورىپ ايتا المايمىز. كەنتاۋ قالاسىندا 6 ءۇي اپاتتى دەپ تانىلعان. بىراق ولاردىڭ سەبەبىن جەر استى سۋلارى دەپ ايتا المايمىز. سەبەبى 5 قاباتتى, 2 قاباتتى ۇيلەر وتىرىپ قالىپ, كوشىرۋ جۇمىسىن جۇرگىزىپ جاتىرمىز», – دەدى كەنتاۋ قالاسى اكىمىنىڭ ورىنباسارى عالىمجان تولەپوۆ.

جەر استى سۋىنىڭ كوتەرىلۋ سەبەبىن مينيسترلىكتەن كەلگەن ارنايى كوميسسيا انىقتاماق. ال وعان دەيىن تۇرعىنداردىڭ قابىرعاسى جارىلىپ, سىلاعى تۇسكەن ۇيدە امالداۋىنا تۋرا كەلەدى.