«Shahar shógip kete me»: Kentaý turǵyndary turǵyn úılerge qaýip tónip turǵanyn aıtyp, dabyl qaqty

 Foto: Almaty.tv

Kentaýda jer asty sýlary kóterilip, turǵyn úılerge qaýip tóne bastady. Tipti páterler qabyrǵasyndaǵy jaryǵy kún sanap úlkeıip barady. Jergilikti turǵyndar másele jaqyn arada sheshilmese, úıindiniń astynda qalamyz ba dep qorqady, dep habarlaıdy qandastar.kz

Kendi shahar turǵyndary kúndiz kúlkiden, túnde uıqydan aıyrylǵan. Sebebi páterlerdiń qabyrǵalary men joǵarǵy bóligi jarylyp jatyr. Jurt jertólege tolyp qala beretin sýdy qansha ret tazalatqanmen, paıda joq. Sebebi jer asty sýy qaıta-qaıta kóterilip kete beretin kórinedi.

«2020 jyly ekologııalyq joba qarastyryldy. Aýyz sý, jer asty sýy ınstıtýt qyzmetkerleri, arnaıy organdar qatysty. Zertteý jumysyn júrgizip, qala  sýǵa shógetini aıtyldy», – dedi Kentaý qalasynyń turǵyny Baqtııar Ǵafýrov.

Almaty.tv jazǵandaı, jergilikti bılik máseleni sheshý úshin turǵyn úıdiń dál janynan arnaıy qudyq qazǵan. Alaıda turǵyndar «jaǵdaıdy odan da ýshyqtyryp jiberdi» deıdi. Sebebi kóktem saıyn jertóle sýǵa tolyp qala beredi.

«Irgemizden qudyq qazdy. Asfaltten ary 800 metr qashyqtyqtaǵy nárseni úıdiń dál janyna qudyq qazyp, 300 metr tereńnen sý shyǵardy», – dedi Kentaý qalasynyń turǵyny Dastan Aıtpenov.

Telearnanyń málimetinshe, Kentaýda jer asty sýy 2004 jyldan beri qaýip tóndirip keledi. Jaýaptylar úılerge qanshalyqty zaqym kelgenin arnaıy tekseristen keıin ǵana aıtady.

«Jer asty sýynyń jarylýyn birden kórip aıta almaımyz. Kentaý qalasynda 6 úı apatty dep tanylǵan. Biraq olardyń sebebin jer asty sýlary dep aıta almaımyz. Sebebi 5 qabatty, 2 qabatty úıler otyryp qalyp, kóshirý jumysyn júrgizip jatyrmyz», – dedi Kentaý qalasy ákiminiń orynbasary Ǵalymjan Tólepov.

Jer asty sýynyń kóterilý sebebin mınıstrlikten kelgen arnaıy komıssııa anyqtamaq. Al oǵan deıin turǵyndardyń qabyrǵasy jarylyp, sylaǵy túsken úıde amaldaýyna týra keledi.