«شامپۋردى سۇعىپ ولتىرگەن»: مەكتەپ تۇلەگى كوز جۇمعان جەردە نە بولىپ جاتىر

الماتى وبلىسى قاراساي اۋدانىنا قاراستى قىرعاۋىلدى اۋىلىنداعى ورتا مەكتەپتىڭ تۇلەگى سىنىپتاسىنىڭ قولىنان قازا تاپقانىن بۇعان دەيىن حابارلاعان ەدىك. وقيعا بولعان جەرگە Sputnik قازاقستان ءتىلشىسى بارىپ, ءمان-جايدى ءبىلىپ قايتتى, دەپ حابارلايدى Qandasta.kz. 

قايعىلى وقيعا 24 مامىرعا قاراعان ءتۇنى بولعان. وقۋشىلار جالعا العان كوتتەدجدىڭ ەسىگىنە ءمور باسىلعان, كىرۋگە رۇقسات جوق.

Sputnik قازاقستان ءتىلشىسى كورشىلەردەن ءمان-جايدى سۇرادى. ايتۋلارىنشا بۇل دەمالىس ورنى ەكس-پروكۋروردىڭ مەنشىگى.

تۇرعىندار كۇزەتى جوق ساياجايدا ءبىر كۇنى جانجال بولاتىنى انىق ەدى دەپ وتىر.

«تاڭعى ساعات بەستە جۇمىسقا شىعىپ ەدىم, 7-8 پوليتسيا كولىگى تۇر ەكەن. نە بولدى دەپ سۇراپ ەدىم, ادام ءولدى دەدى. ساياجايدى جالعا بەرگەن سوڭ ونى كۇزەتۋ كەرەك, دەمالۋشىلاردىڭ قاۋىپسىزدىگىنە نازار اۋدارۋ كەرەك. بۇل جەرگە كىم كەلىپ, كىم كەتپەي جاتىر», — دەيدى شولپان ەسىمدى كورشى.

ەسكە سالا كەتەيىك, ورتا مەكتەپتىڭ 11-سىنىپ وقۋشىلارى مەكتەپ ءبىتىرۋ كەشىن اتاپ وتپەك بولىپ, قىرعاۋىلدى اۋىلىنىڭ ماڭىنداعى «Dolan hills» كوتتەدجىن جالعا العان. كوڭىلدى كەشتەن اتا-انالارىنىڭ ۆاتساپ چاتىنا فوتولار جىبەرىپ, جاعدايدان حاباردار ەتىپ تۇرعان. الايدا ەكى وقۋشى اراسىندا جانجال شىعىپ, ءبىرى ەكىنشىسىنە كاۋاپ پىسىرەتىن شامپۋردى سۇعىپ العان. وقۋشى وقيعا ورنىندا كوز جۇمدى.

ەكى وقۋشىنىڭ دا اتا-اناسى قاراپايىم ەڭبەك ادامدارى ەكەن. پوليتسيا سىنىپتاسىن ءولتىردى دەگەن كۇدىككە ىلىنگەن بوزبالانى وقيعا ورنىندا ۇستادى.

«ادام ءولتىرۋ فاكتىسى بويىنشا سوتقا دەيىنگى تەرگەۋ امالدارى باستالدى. كۇدىكتى دەپ تانىلعان جابىرلەنۋشىنىڭ سىنىپتاسى ۋاقىتشا ۇستاۋ يزولياتورىنا قامالدى. كامەلەتكە تولماعان بالانىڭ زاڭدى وكىلدەرى بالالاردى تاربيەلەۋ جونىندەگى مىندەتتەرىن تيىسىنشە ورىنداماعانى ءۇشىن اكىمشىلىك جاۋاپكەرشىلىككە تارتىلدى», — دەيدى وبلىستىق پوليتسيا دەپارتامەنتى.

ءبىلىم باسقارماسىنا ۇسىنىس ەنگىزىلگەن.

«بۇل ءۇيدى ىلعي جالعا بەرەدى. باعاسى ءبىر تاۋلىككە شامامەن 100-120 مىڭ تەڭگە. ساياجايدىڭ يەسى بۇرىن قالا پروكۋرورى بولعان, قازىر زەينەتكەر. ءبىر بۇل ەمەس, وسى كوشەنىڭ بويىنداعى تالاي ءۇيدى ساتىپ العان», — دەيدى ساياجاي ماڭىنداعى كورشىلەر