Shanhaı – Almaty áýe reısi ashylady

Qytaıdyń China Eastern Airlines áýe kompanııasy Shanhaı – Almaty baǵyty boıynsha jańa tikeleı áýe reısin iske qosady, dep habarlaıdy Qandastar.kz aqparat portaly. 

Shanhaıdan Almatyǵa China Eastern Airlines-tiń alǵashqy ushaǵy 4 shildede kelip qonady dep kútilýde.

Bul oqıǵa eki megapolıs arasyndaǵy týrıstik, mádenı jáne iskerlik baılanystardy nyǵaıtý jolyndaǵy mańyzdy qadam bolmaq.

«Alǵashqy reıspen áýe kompanııasynyń ókilderi, qytaılyq BAQ pen blogerler kelip jetedi dep josparlanýda. Bul Qytaıda áýe reısiniń ashylýyn keńinen jarııalaýǵa múmkindik beredi. Osyǵan oraı qalalyq týrızm basqarmasy “Almatynyń sımvoly – syılyq retinde” atty akııa uıymdastyrady – reıs jolaýshylaryna estelik syılyqtar tabystalady», – delingen habarlamada.

Ákimdiktiń málimetinshe, bul – atalǵan áýe kompanııanyń Ortalyq Azııaǵa alǵashqy baǵyty.

Jańa marshrýt 2025 jyldyń aqpanynda Almaty qalasy ákimdigi men China Eastern Airlines basshylyǵy arasynda qol jetkizilgen kelisimderdiń nátıjesi boldy.

Búginde Almaty Beıjiń, Gýanchjoý, Sıan, Úrimji, Hanchjoý jáne Sanıa qalalarymen tikeleı áýe reısteri arqyly baılanysqan. Jańa baǵyt qoldanystaǵy jelini tolyqtyryp, aı saıyn 150-den astam reıs oryndalatyn eki el arasyndaǵy áýe qatynasynyń jıiligin arttyrady.