جاڭالىقتار
شارۋالاردى قارجىلاندىرۋ شارالارىن بارىنشا جەڭىلدەتۋ قاجەت – سەرىك جۇمانعارين
![](https://qandastar.kz/wp-content/uploads/2024/06/IMG_6651-580x405.jpeg)
اۋىل شارۋاشىلىعى ۆيتسە-ءمينيسترى ەربول تاسجۇرەكوۆتىڭ ايتۋىنشا, بۇگىندە «اگرارلىق نەسيە كورپوراتسياسى» اق, «قازاقستاننىڭ دامۋ بانكى» اق جانە Halyk bank-پەن بىرلەسىپ 444,5 ملرد تەڭگە سوماسىنا جەڭىلدەتىلگەن قارجى بەرۋ ءۇشىن اوك سالاسىنداعى 90 جوبادان تۇراتىن پۋل قالىپتاستىرىلدى. بۇل ەت, ءسۇت, استىق وڭدەۋ, جىلىجاي شارۋاشىلىعىن دامىتۋ سياقتى مەملەكەت ءۇشىن باسىم باعىتتار بويىنشا ءوندىرىس كولەمىن ارتتىرۋعا مۇمكىندىك بەرەتىن جوبالار. انك-تە نەسيە سوماسى 81,2 ملرد تەڭگەگە 43 جوبا, قدب-دا 285 ملرد تەڭگەگە 14 جوبا, Halyk bank-تە 78,3 ملرد تەڭگەگە 33 جوبا بار.
الايدا قارجىلاندىرۋدىڭ بەلسەندى قارقىنى كەزىندە نەسيە الۋ ءۇشىن كەپىلدىڭ بولماۋى شارۋالار ءۇشىن ايتارلىقتاي كەدەرگى بولىپ وتىر.
«ءبىز «دامۋ» كاسىپكەرلىكتى دامىتۋ قورى مەن قازاقستاننىڭ ەكسپورتتىق نەسيە اگەنتتىگىنە كەپىلدىك بەرۋ مۇمكىندىكتەرىن قاراستىرۋ ءۇشىن جوبالار ءتىزىمىن جىبەردىك. كەپىلدىك جەتكىلىكسىز بولعان جاعدايدا «دامۋ» قورى فەرمەرلەردىڭ انك جانە ەكىنشى دەڭگەيلى بانكتەردەگى نەسيەلەرىنىڭ 85%-ىنا دەيىن كەپىلگەر بولادى. ال ەنا وڭدەۋشى سەكتورداعى ەكسپورتتاۋشى كاسىپورىندارعا ساقتاندىرۋ بويىنشا قولداۋ كورسەتەدى. «دامۋ» كەپىلدەمە قۇرالى فەرمەرلەرگە جەڭىلدەتىلگەن مولشەرلەمە بويىنشا نەسيە الۋعا ايتارلىقتاي ىقپال ەتەدى. الايدا «دامۋداعى» قۇجاتتىق قايشىلىقتار مەن ەنا-داعى جوعارى تاريفتەرگە بايلانىستى فەرمەرلەرگە نەسيە بەرۋدى قيىنداتاتىن كەدەرگىلەر تۋىندايدى», — دەپ اتاپ ءوتتى ەربول تاسجۇرەكوۆ.
ۆيتسە-پرەمەر دە شارۋالاردىڭ قارجىلاندىرۋعا قول جەتكىزۋىن بارىنشا جەڭىلدەتۋ قاجەتتىلىگى تۋرالى مالىمدەدى.
«ءبىز شارۋالاردىڭ قارجىلاندىرۋعا قولجەتىمدىلىگىن بارىنشا جەڭىلدەتۋىمىز كەرەك. ۇكىمەت شارۋالاردىڭ كوكتەمگى دالا جۇمىستارىنا قارجىنى اۋىلشارۋاشىلىق كووپەراتيۆى ارقىلى الۋعا مۇمكىندىك بەرەتىن شارالاردى قازىردىڭ وزىندە قولعا الىپ جاتىر. سوندىقتان ەندى شارۋالارعا قولايلى, قارجى ينستيتۋتتارى ءۇشىن قاۋىپسىز تەتىكتەردى بىرلەسىپ ازىرلەۋىمىز كەرەك. ەكسپورتتىق نەسيە اگەنتتىگى اۋىل شارۋاشىلىعىنىڭ باسىم جوبالارى ءۇشىن تاريفتەردى تومەندەتۋ مۇمكىندىگىن قاراستىرۋى قاجەت. ال اۋىل شارۋاشىلىعى مينيسترلىگى «بايتەرەك» حولدينگىمەن بىرلەسىپ, اگروونەركاسىپ كەشەنىندەگى ينۆەستيتسيالىق جوبالارعا كەپىلدىك بەرۋ باعدارلاماسى بويىنشا قاراجات ءبولۋدىڭ نۇسقالارىن ازىرلەسىن», — دەپ تۇيىندەدى جيىندى سەرىك جۇمانعارين.