شاتالوۆ ءوزىن رەسەيشىل دەپ ايىپتاعاندارعا جاۋاپ بەردى

فوتو: ءماجىلىس

ءماجىلىس دەپۋتاتى نيكيتا شاتالوۆ وزىنە قاتىستى تاراپ جاتقان ايىپتاۋلار مەن قاۋەسەتتەرگە جاۋاپ بەردى, دەپ حابارلايدى qandastar.kz

«مەن قازاقپىن, بۇل – مەنىڭ باستى بولمىسىم. سوڭعى ۋاقىتتا مەنى «ۆاتنيك», «شەتەلدىڭ اگەنتى», «پروكرەملدىك» دەپ ايىپتاعاندار بولدى. بىراق بۇل ايىپتاۋلاردىڭ ەشقايسى شىندىققا جاناسپايدى», – دەدى شاتالوۆ.

دەپۋتاتتىڭ ايتۋىنشا, ونىڭ سوزدەرى كەيبىر رەسەيلىك باق-تا بۇرمالانىپ, كونتەكستەن ۇزىلگەن. ول بۇل جاعدايدىڭ مانيپۋلياتسيا ەكەنىن جانە وعان قارسى تۇراتىنىن جەتكىزدى.

«مەن تاۋەلسىز قازاقستاندا دۇنيەگە كەلدىم. ول كەزدە, قۇدايعا شۇكىر, كەڭەس وداعى جوق ەدى. وسى جەردە ءوسىپ-ءوندىم, وتباسىن قۇردىم, بالالى-شاعالى بولدىم. مەنىڭ جالعىز وتانىم – قازاقستان. باسقا وتانىم جوق جانە بولمايدى دا!», – دەدى ول.

Dalanews.kz جازعانداي, شاتالوۆ قازىرگى جاعدايدى اقپاراتتىق شابۋىل دەپ سانايتىنىن ايتىپ, بۇل ماسەلەنى جاي قالدىرمايتىنىن مالىمدەدى. سونىمەن قاتار ول الداعى ۋاقىتتا مۇنداي تۇسىنبەۋشىلىكتەرگە جول بەرمەۋگە تىرىساتىنىن اتاپ ءوتتى.

ەسكە سالايىق, بۇعان دەيىن ءماجىلىس دەپۋتاتى نيكيتا شاتالوۆ كۋلۋاردا الەۋمەتتىك جەلىدە وزىنە قارسى كوپ جازىلعان سىني پىكىرلەرگە جاۋاپ بەرگەن ەدى. نيكيتا شاتالوۆ “پاراگراف” سايتىندا ءوزىنىڭ ءومىربايانى قاتە جازىلىپ كەتكەنىنە (قازسسر-دا تۋعان دەپ جازىلعان) ءوزىنىڭ قاتىسى جوعىن ايتقان بولاتىن. ونى تەحنيكالىق قاتەلىك دەپ اتادى. اقپارات كوزىنە حابارلاسىپ, قاتەلىكتى تۇزەتۋدى وتىنگەنىن دە جەتكىزدى.

«سول قاتەلىكتى ءبىرتۇرلى اينالدىرىپ, مەن كوزىممەن كورمەگەن سوۆەت وداعىمەن ارالاستىرىپ جىبەرىپتى. مەن وعان كوپ نازار اۋدارمايمىن. ادامدار اقپاراتپەن مانيپۋلياتسيا جاساپ, مەن جازباعان, ايتپاعان اقپاراتتاردى تاراتتى. مەن جاريا تۇلعا ەكەنىمدى ەسكەرە كەلە بۇعان سابىرلى تۇردە قارايمىن», – دەيدى ول.

دەپۋتات ءوزىن رەسەيشىل دەپ ايىپتاعانداردىڭ ايتقانى “قىپ-قىزىل وتىرىك” دەپ جاۋاپ بەردى. گەوساياسات جايلى ءسوز قوزعاعاندا ءاردايىم قازاقستاننىڭ ۇلتتىق مۇددەسى تۇرعىسىنان جازاتىنىن جەتكىزدى.

مەن وسى ەلدىڭ پاتريوتىمىن. باسقا ادامدارعا بىردەڭە دالەلدەۋگە زاۋقىم جوق. مەنى ءجىتى وقىعان ادامدار, ءسوزىمدى وقىپ, كورىپ وتىرعاندار قانداي مۇددەلەردى قورعايتىنىمدى بىلەدى. ۇستانىمىمنىڭ رەسەيگە ەش قاتىسى جوق. وكىنىشكە قاراي, مۇنداي قۇبىلىس مەن ەتنيكالىق ورىس بولعاننان كەيىن تۋىنداپ جاتىر دەپ ايتۋعا ءماجبۇرمىن. سەبەپ سول, – دەيدى ول.

بۇعان دەيىن نيكيتا شاتالوۆ الەۋمەتتىك جەلىدەگى پاراقشاسىندا گەوساياسي تاقىرىپتا جازبا قالدىرىپ, سول ءۇشىن سىنعا قالعان ەدى. ونى رەسەيشىل دەپ ايىپتاعاندار بولدى. ول سوزىندە ۋكراينانى قولداپ وتىرعان باتىس ەلدەرىن “يدەاليست” دەپ اتاپ, ۋكراينا پرەزيدەنتىنىڭ كومانداسىن سىناعان. ونىڭ الدىندا كاسپي قۇبىرى كونتسورتسيۋمىنىڭ رەسەيدەگى ستانتسياسىنا درونمەن شابۋىل جاسالعاندا شاتالوۆ قازاقستان ۋكراينانى جاۋاپكەرشىلىككە شاقىرۋ كەرەك دەپ ءمالىم ەتكەن.