شاۆحات راحمونوۆتىڭ ايەلى جول اپاتىنا ۇشىرادى: قازا تاپقاندار بار

MMA جاۋىنگەرى, UFC-دەگى العاشقى قازاقستاندىق سپورتشى شاۆحات راحمونوۆتىڭ جۇبايى تىزگىندەگەن كولىك جول اپاتىنا ۇشىراپ, سالدارىنان ەكى جولاۋشى قازا تاپتى, دەپ حابارلايدى Qandastar.kz

جول اپاتى جامبىل وبلىسىنىڭ مويىنقۇم اۋدانىنداعى تاسجول بويىندا بولعان.

بەلگىلى بولعانداي, گۇلايىم راحمونوۆا ۇلى جانە قۇربىلارىمەن قاراعاندىدان الماتىعا بارا جاتقان.

سپورتشىنىڭ جارى تىزگىندەگەن Toyota Land Cruiser كولىگى الماتى-ەكاتەرينبۋرگ تاسجولىنىڭ 296 شاقىرىمىندا, اقسۇيەك اۋىلىنىڭ ماڭىندا اۋدارىلعان. الدىن الا دەرەكتەرگە سايكەس, ايەل ءرولدى باسقارا الماي قالعان.

جول اپاتى سالدارىنان وقيعا ورنىندا 39 جاستاعى جولاۋشى كوز جۇمدى. 35 جاستاعى ەكىنشى جولاۋشى مويىنقۇم اۋداندىق اۋرۋحاناسىنا بارا جاتقان جولدا قايتىس بولدى.

راحمونوۆا مەن ونىڭ 2022 جىلى دۇنيەگە كەلگەن ۇلى شۋ قالالىق اۋرۋحاناسىنا جەتكىزىلىپ, تراۆماتولوگيا بولىمشەسىنە جاتقىزىلعان. دارىگەرلەر ولاردىڭ جاعدايىن ورتاشا دەپ باعالاپ وتىر.

وتا جاساۋ قاجەت ەتىلمەيدى. ولار دارىگەرلەردىڭ باقىلاۋىندا, — دەدى اۋرۋحانادان.

پوليتسيا ەكى جانە ودان كوپ ادامنىڭ ولىمىنە اكەلگەن جول قوزعالىسى ەرەجەلەرىن بۇزۋ بابى بويىنشا سوتقا دەيىنگى تەكسەرۋدى باستادى. باسقا اقپارات تەرگەۋ مۇددەسىنە بايلانىستى جاريا ەتىلمەيدى.