شەرزات بولاتتىڭ ولىمىنە بايلانىستى تاعى ءبىر كۇدىكتى ۇستالدى

فوتو: كوللاج KursivMedia

الماتى وبلىسى تالعار اۋدانىندا قايتىس بولعان 16 جاستاعى شەرزات بولاتتىڭ ىسىنە بايلانىستى تاعى كۇدىكتى قاماۋعا الىندى. وبلىستىق پوليتسيا دەپارتامەنتى Qandastar.kz KursivMediaعا سىلتەمە جاساي وتىرىپ كۇدىككە ىلىنگەن ازاماتتاردىڭ سانى 11 بولعانىن راستادى.

«17 قازاندا كامەلەتكە تولماعان ش.بولاتتى ءولتىرۋ فاكتىسى بويىنشا قىلمىستىق ءىستى تەرگەۋ بارىسىندا تاعى ءبىر كۇدىكتى – ك. ەسىمدى ازامات ۇستالدى», – دەلىنگەن اقپاراتتا.

پوليتسيا دەپارتامەنتى تەرگەۋ جۇمىستارى ءالى دە جالعاسىپ جاتقانىن, ءىستى تىكەلەي ىشكى ىستەر ءمينيسترى باقىلاپ وتىرعانىن حابارلادى.

ايتا كەتەيىك, وسىعان دەيىن شەرزات بولاتتىڭ ولىمىنە قاتىستى ءىس بويىنشا 10 ادامنىڭ قاماۋعا الىنعانى بەلگىلى بولعان. قىلمىستىق ىسكە بايلانىستى پوليتسيا «بۇزاقىلىق», «قورقىتۋ», «ادام ءولتىرۋ» جانە «قىلمىس تۋرالى حابار بەرمەۋ» فاكتىلەرى بويىنشا ءىس قوزعاعان.

بۇدان بولەك, شەرزاتتىڭ اتا-اناسىنىڭ ۇيىنە قويىلعان ورتكە بايلانىستى تاعى ءبىر قىلمىستىق ءىس قوزعالعان.

16 جاستاعى مەكتەپ وقۋشىسى 4 قازاندا دۇكەن ماڭىندا شىققان جانجالدان كەيىن كىسى قولىنان قازا تاپقان. ءىستى ءىىم جەكە باقىلاۋىنا العان.