شەرزات ءىسى بويىنشا 170-تەن استام كۋاگەردەن جاۋاپ الىنىپ, 40 ساراپتاما تاعايىندالعان

بەلگىلى زاڭگەر, ءماجىلىس دەپۋتاتى ابزال قۇسپان شەرزات پولات پەن ونىڭ وتباسى مۇشەلەرىنىڭ ىسىنە قاتىستى پىكىر ءبىلدىردى, – دەپ جازدى qandastar.kz

«سوڭعى كۇندەرى تالعارداعى شەرزات پولاتتىڭ ولىمىنە قاتىستى قوعامدا قىزۋ تالقىلاۋ ءجۇرىپ جاتقانى بەلگىلى.

الەۋمەتتىك جەلىلەردە ءارتۇرلى اقپاراتتاردىڭ تارالۋىنا بايلانىستى, كوپ جاعدايدا تەكسەرىلمەگەن, ەموتسياعا تولى جازبالار مەن بەينەۇندەۋلەرگە نازار اۋدارىلۋدا.

وسىعان بايلانىستى ارىپتەسىم, دەپۋتات, زاڭ عىلىمدارىنىڭ دوكتورى ءۇنزيلا شاپاقپەن بىرگە بولعان وقيعانىڭ ءمان-جايىمەن جەتە تانىسۋ ءۇشىن ارنايى الماتى وبلىسىنا باردىق.

ءىستىڭ بارىسىن زەردەلەۋ ماقساتىندا الماتى وبلىسىنىڭ پروكۋرورى بەرىك ابىزباي ۇلىمەن, وبلىستىڭ پوليتسيا دەپارتامەنتىنىڭ باسشىسى مەيرام جۇمكەن ۇلىمەن جولىقتىق.

مەن, زاڭگەر رەتىندە, بۇل اۋىر جاعدايلاردى قۇقىقتىق تۇرعىدا قاراستىرۋدىڭ ماڭىزدىلىعىن اتاپ وتكىم كەلەدى. مۇنداي ىستەردە قوعام تاراپىنان جاسالعان قىسىم تەرگەۋ امالدارىنىڭ وبەكتيۆتى ءارى جان-جاقتى جۇرگىزىلۋىنە كەرى اسەرىن تيگىزۋى مۇمكىن», – دەيدى ول.

پروكۋراتۋرانىڭ رەسمي اقپاراتىنا سايكەس, قاساقانا كىسى ءولتىرۋ كۇدىگىمەن 11 ادام ادام ۇستالعانى بەلگىلى. قازىرگى تاڭدا ءتيىستى تەرگەۋ امالدارى جۇرگىزىلۋدە. وسى ءىس بويىنشا 170-تەن استام كۋاگەرلەردەن جاۋاپ الىنىپ, 40 جۋىق ساراپتاما تاعايىندالىپ, جان-جاقتى تەرگەلىپ جاتىر.

«سونىمەن قاتار, شەرزات پولاتتىڭ اعاسى ن. عايىپباەۆتىڭ ءولىمى دە باس پروكۋراتۋرا مەن ىشكى ىستەر مينيسترلىگىنىڭ باقىلاۋىندا ەكەنىن اتاپ وتكەن ءجون. ول بويىنشا سوت-مەديتسينالىق ساراپتامالار جۇرگىزىلۋدە.

قىلمىستىق ءىستىڭ قوعامدىق ماڭىزدىلىعىنا بايلانىستى, مەن تەرگەۋ بارىسىمەن تانىسىپ, زاڭگەر رەتىندە ءمان-جايدى ناقتى انىقتاۋ ءۇشىن جۇمىس ىستەپ جاتىرمىن. بۇل ءىستىڭ ءادىل ءارى اشىق قارالۋىنا ىقپال ەتۋ – باستى ماقساتىمىز.

العاشقى ناتيجەلەرگە كەلسەك, وبلىس پروكۋرورى بەرىك ابىزباي ۇلىمەن كەزدەسۋ بارىسىندا تەرگەۋ امالدارىنىڭ بارىنشا زاڭ اياسىندا جانە تياناقتى جۇرگىزىلۋىن تالقىلادىق.

وبلىستىق پروكۋراتۋرا بۇل ءىستىڭ قۇقىقتىق جانە ادىلدىك پرينتسيپتەرىنە ساي قارالاتىنىن مالىمدەپ, بىزگە ۋادە بەردى.

الداعى ۋاقىتتا تەرگەۋ بارىسى مەن رەسمي اقپاراتتار تۋرالى قوعاممەن ۇنەمى ءبولىسىپ وتىراتىن بولامىن. قازىرگى تاڭدا كەز كەلگەن راستالماعان اقپاراتتان اۋلاق بولۋعا جانە رەسمي دەرەككوزدەرگە سۇيەنۋگە شاقىرامىن», – دەپ جازدى زاڭگەر.