شەرزات ءىسى بويىنشا اپپەلياتسيالىق سوت: ساكيەۆتىڭ اناسى تىلشىلەردى بالاعاتتاعانى ءۇشىن كەشىرىم سۇرادى

فوتو: Orda.kz.

5 ماۋسىم كۇنى سوت شەرزات ىسىندەگى راۆيل ساكيەۆتى بۇزاقىلىق پەن كىسى ولتىرۋگە وقتالعانى ءۇشىن 20 جىلعا كولونياعا قاماۋ جازاسىنا كەستى, دەپ جازدى qandastar.kz

وسى ۇكىم جاريالانعاننان كەيىن ونىڭ اناسى بايان سارمانوۆا ايعاي-شۋ شىعارىپ, داۋ تۋعىزعان ەدى. سول كەزدە وقيعانى جاريالاپ جۇرگەن جۋرناليستەرگە دە ول داۋىس كوتەرىپ, بالاعاتتاعان بولاتىن. بۇگىن ايەل سول قىلىعى ءۇشىن كەشىرىم سۇرادى, دەپ حابارلايدى Orda.kz.

سول كەزدەگى دورەكى سوزدەرى ءۇشىن ايەلگە قوعامدىق ءتارتىپتى بۇزدى دەگەن ايىپ تاعىلىپ, ايىپپۇل سالىنعان ەدى.

بۇگىن اپەللياتسيالىق شاعىم قارالعان كەزدە ول جۋرناليستەردەن ءوز قىلىعى ءۇشىن كەشىرىم سۇراپ, ولاردىڭ تەك ءوز مىندەتىن اتقارىپ جۇرگەنىن مويىندادى.

«ەموتسياعا بەرىلىپ, بالاعات سوزدەر ايتقانىم ءۇشىن ءدال جۋرناليستەردەن كەشىرىم سۇرايمىن. سىزدەردىڭ بۇل ىسكە قاتىستارىڭىز دا, كىنالارىڭىز دا جوق. ول سىزدەردىڭ جۇمىستارىڭىز. ال مەن بۇگىنگى اپپەلياتسيالىق سوتتا قاساقانا ادام ءولتىرۋ بابىمەن ايىپتاپ, 20 جىلعا سوتتاعانىنا, سول 99 باپقا كەلىسپەيمىن. بالام دا كەلىسپەيدى. ول جەردە بەينەتاسپادا كىمنىڭ قولىندا پىشاق بولعانى كورىنىپ تۇر. مەنىڭ بالامدى دالەلدەنبەگەن دەپ پروكۋراتۋرا ءوزىنىڭ جازعانىنا ءوزى قايشى شىعىپ جاتىر. بالامدى 293 باپپەن, بۇزاقىلىق جاسادى دەپ ايىپتاعاندارىنا كەلىسەمىن.  بۇكىل سوتتا مەن بالالاردان سۇراپ شىقتىم. ولار راۆيل قايدا بارا جاتقانىن بىلگەن جوق دەدى. مەن بۇگىنگى سوتقا سونى سۇراپ كەلىپ تۇرمىن», — دەدى ءراۆيلدىڭ اناسى.

دەگەنمەن, ايەل ءالى كۇنگە دەيىن ۇلى ەشكىمنىڭ ومىرىنە قاستاندىق جاساماعانىن, ونىڭ كىناسى تەك بۇزاقىلىقپەن شەكتەلەتىنىن ايتىپ وتىر.

ايتا كەتۋ كەرەك, سوت ۇكىمى وقىلعان سوڭ, سوتتالۋشىلار وزدەرى وتىرعان ورىننىڭ اينەگىن ۇرىپ, ەسىگىن تەۋىپ, نارازىلىق ءبىلدىردى. ولاردىڭ اتا-انالارى مەن جاقىندارى وسىدان كەيىن ورە تۇرەگەلىپ, ايقايعا باستى.

بۇل وقيعا قازاق قوعامىن ءدۇر سىلكىندىرىپ, قىزۋ تالقىعا ءتۇستى. وقيعا بىلتىر تالعاردا 4 قازان كۇنى بولعان ەدى. ءبىر توپ ادام, سونىڭ ىشىندە وسى سوتتالۋشىلار دۇكەن يەسى قارجاۋبايمەن, ۇلى شەرزاتپەن جانە اعاسى نۇرعاناتپەن جانجالداسىپ, ارتى كىسى ولىمىنە ۇلاستى. 16 جاسار شەرزات قازا بولدى.

9 جەلتوقسان كۇنى تاڭەرتەڭ ءجاسوسپىرىم شەرزات پولاتتىڭ اعاسى نۇرعانات عايىپباەۆتىڭ دەنەسى مارقۇم شەرزاتتىڭ زيراتىنىڭ قاسىنان تابىلدى. 12 قازان كۇنى ازات اۋىلىنداعى مارقۇم بولعان شەرزاتتىڭ وتباسىنىڭ ءۇيى ورتەنىپ كەتتى.