شەرزات ءىسى: قارجاۋباي نۇرىموۆتىڭ قارىنداسى سوڭعى جايتتارمەن ءبولىستى

فوتو: اشىق دەرەككوز

9 جەلتوقساندا مارقۇم شەرزات پولاتتىڭ اعاسى نۇرقانات عايىپباەۆتىڭ ءمايىتى تالعار قالاسىنىڭ شەتىنەن تابىلدى. ال 10 جەلتوقساندا اشىنعان قارجاۋباي نۇرىموۆ قولىنا پىشاق ۇستاپ, جۋرناليستەردىڭ كەلۋىن تالاپ ەتتى. ەرتەسىنە ول “بۇزاقىلىق” بابى بويىنشا سوتتالىپ, 15 كۇنگە قاماۋعا الىندى. قارجاۋباي نۇرىموۆتىڭ قارىنداسى وتباسىنىڭ قازىرگى جاعدايى مەن ءىنىسىنىڭ قازا بولعان كۇنى قانداي كۇيدە بولعانىن جەتكىزدى. بۇل تۋرالى qandastar.kz اقپارات اگەنتتىگى Qazaq AIRAN YouTube-ارناسىنا سىلتەمە جاساپ حابارلايدى.

پەريزات نۇرىموۆانىڭ سوزىنشە, 10 جەلتوقسان كۇنى اعاسى قارجاۋباي جۋرناليستەر مەن اكىمنىڭ كەلۋىن تالاپ ەتكەن.

“حالىق جينالىپ ميتينگ ۇيىمداستىرسىن, قانتوگىس بولسىن, دەپ ايتقان جوقپىز. تەك 1 ساعات بەرسىن, ادامدار كەلىپ ۇلگەرسە ەكەن دەگەن نيەت بولدى. وقيعا ورنىنا ءبىرىنشى قارا كيىمدى ارنايى جەدەل ارەكەت ەتۋ جاساعى كەلدى. ەكىنشى پوليتسيا كەلىپ ماشينانى قورشاپ تۇردى. ءۇشىنشى اسكەري كيىممەن تاعى ادامدار كەلىپ, قارجاۋباي مەن ءسىڭلىم سالتاناتتى تۇسىرگىسى كەلدى. سول ساتتە جولداسىم زيانى ءتيىپ كەتپەسىن دەپ كولىككە ءمىنىپ, سالتاناتتى سوققىدان قورعاپ تۇردى. سوسىن اسكەريلەر ونى دا ۇرىپ-سوعىپ, كولىككە سالىپ الىپ كەتتى. جاي عانا باسىپ الىپ كەتپەدى, كولىكتەن سۇيرەپ ءتۇسىرىپ, ۇرىپ, ەسىنەن تانىپ, قايتا ويانعان سوڭ, باسكيىمىن بەتىنە دەيىن تارتىپ, ءارى قاراي باسىنان تومپەشتەپ ۇرا بەرگەن“, – دەيدى نۇرىموۆا.

سونداي-اق پەريزات نۇرىموۆا ءىنىسى نۇرقانات عايىپباەۆتىڭ ءوز-وزىنە قول سالعانىنا سەنبەيتىنىن جەتكىزدى.

“نۇرقاناتتىڭ جۇبايى بار. ۇيلەنگەنىنە ءبىر جىل بولدى. ەكەۋى بالالى بولۋ ءۇشىن ەم قابىلداپ جۇرگەن ەدى. بالام بولسىن دەپ جۇرگەن ادام ءوز-وزىنە قول سالۋى مۇمكىن ەمەس. سول كۇنى نۇرقاناتتى ۇزاق ىزدەدىك. تۇنگى 23:30-دان باستاپ جولداسىم ەكەۋىمىز شەرزاتتىڭ بەيىتىنە 4-5 رەت باردىق. الايدا ول جەردەن كولىگىن كورمەدىك. ءبىر ۋاقىتتا ءۇيدى كۇزەتىپ تۇراتىن داستان ەسىمدى جىگىت جۇگىرىپ كەلىپ, قارجاۋبايدىڭ قۇلاعىنا بىردەڭە ايتتى. سوسىن اعام بىردەن كولىگىنە وتىرىپ, بەيىت جاققا قاراي باردى. بەيىتكە 50-60 مەتردەي قالعان جەردە قارجاۋباي ايتقان اق KIA كولىگى تۋرا كوز الدىمىزدا ءوتتى. سوسىن داستاننان بۇل كىم, دەپ سۇراعان ەدىك, ء“وزىمىزدىڭ ىشكى ىستەر دەپارتامەنتىنىڭ ادامدارى عوي” دەپ جاۋاپ بەردى. ءبىز جوعارىعا كوتەرىلىپ جاتقاندا اق KIA كولىگى تومەنگە قاراي ءتۇستى. ولار قالاي نۇرقاناتتى تاپپادى. نەگە كەتىپ قالماي, بىزگە قوسىلىپ ىزدەمەدى, دەگەن سۇراقتار تۋىندايدى”, – دەيدى نۇرىموۆا.

پەريزات نۇرىموۆا قايعىلى وقيعا بولعان كۇنى باۋىرى نۇرقاناتتى قانداي كۇيدە تاۋىپ العانىن ايتتى.

“ەكى كۇن بويى سويلەمەي ءجۇردىم. سويلەيتىن شامام بولمادى. سەبەبى شارشادىم. ەرتەڭ نە بولادى, كەلەسى كىم, دەگەن سۇراقتار مازالادى. باۋىرىمنىڭ دەنەسىن ءبىر ساعات قۇشاقتاپ وتىردىم. جەدەل جاردەم كەلگەن جوق. پوليتسيا قىزمەتكەرلەرى دە ءبىر ساعاتتىڭ اراسىندا كەلدى. نۇرقاناتتى اسىپ كەتكەن كەيىپتە عانا تاۋىپ الدىق. ول اسىلىپ تۇرعان جوق. ادام تىكە اسىلىپ تۇرسا ءبىر ءسارى, ول تىزەرلەپ, اياقتارى بۇگىلىپ تۇردى. ادام بۇلاي اسىلىپ قالمايدى. اسىلسا موينىندا شەڭبەر سياقتى ءىز قالۋى كەرەك. ونىڭ ءبىر جاعىندا عانا ءىز بار. ونىڭ جانىندا جارا بار. ارقاسىندا ىسىنگەن, كوگەرگەن جەرلەرى بار”, – دەيدى نۇرىموۆا.

پەريزات نۇرىموۆا ءىنىسى شەرزاتتىڭ قازاسىنان سوڭ ءتۇرلى قوقان-لوقى مەن قورقىتۋعا تاپ بولعاندارىن ايتتى.

“شەرزات قازا بولعان سوڭ جەتىسىندە ءۇيدى ورتەپ كەتتى. ءۇيدى وزدەرىڭ ورتەدىڭدەر دەدى. قازىر ءبارىمىزدىڭ باسىمىز قوسىلىپ نۇرقاناتقا قۇران باعىشتاۋعا مۇمكىندىك بەرمەي جاتىر. شەرزات قايتقان سوڭ كوپتەگەن قوقان-لوقى بولدى. باقىتقا “نۇرقاناتتى ءولتىرىپ كەتەمىز. كەلەسى كەزەكتە نۇرقانات تۇر” دەگەن قورقىتۋ بولدى. ناقتى كىم جازعانىن بىلمەيمىز. باستاپقىدا ادۆوكات جالداۋعا اقشا جيناۋ ءۇشىن TikTok جەلىسىنە باقىتتىڭ ءنومىرىن شىعارعان ەدىك. سودان كەيىن ونىڭ Whats’App-ىنا قورقىتاتىن حابارلاما قالدىرعان. ول حابارلامانىڭ سكرينشوتىن جاساپ, قورعاۋشىلارىمىزعا جىبەردىك. سول كەزدە ەسىمدە قالعانى “كەلەسى كەزەكتە نۇرقانات” دەگەن حابارلاما”, – دەيدى نۇرىموۆا.