Sherzat isindegi prokýror habarlama jasady

Sherzat Polat isi boıynsha memlekettik aıyptaýshy Dana Sársenbaı áleýmettik jelidegi paraqshasynda qazaqstandyqtarǵa úndeý joldady, dep habarlaıdy qandastar.kz

Prokýrordyń aıtýynsha, áleýmettik jelilerde óziniń atyn, qyzmetin jáne fotosýretterin zańsyz paıdalanyp, jalǵan akkaýnttar ashylyp jatqan kórinedi.

“Osyǵan baılanysty beıneúndeý jasaýdy qajet dep sanaımyn. Meniń Instagram áleýmettik jelidegi jalǵyz akkaýntym – @s.d.n__. Paraqsha tek otbasym men jaqyndarymmen baılanys ornatý úshin ǵana qurylǵan. Bul paraqshada eshqandaı resmı jarııalanym, pikir nemese kásibı sıpattaǵy aqparat jarııalanbaıdy. Meniń atymnan ashylǵan basqa barlyq paraqshalar – jalǵan”,  – deıdi prokýror.

Dana Sársenbaı óziniń atynan ashylǵan jalǵan paraqshalarda túrli blogerlerge jazylýǵa shaqyrýlar, jalǵan saýalnamalar men siltemeler, syılyqtar men utys oıyndary, qylmystyq iske qatysy bardaı kórsetilgen jalǵan málimetter taratylyp jatqanyn málimdedi.

Prokýror azamattardy saq bolýǵa, jalǵan aqparatqa senbeýge jáne taratpaýǵa shaqyrdy.