شەرزات ءولىمى بويىنشا ىستە ادۆوكاتتار پروكۋروردى اۋىستىرۋدى سۇرادى: سۋديا ءوتىنىشتى قاناعاتتاندىرمادى

تىكەلەي ەفيردەن سكرينشوت

شەرزات پولاتتىڭ ءولىمى بويىنشا قىلمىستىق ىستە سوتتالۋشىلار مەملەكەتتىك ايىپتاۋشىنى ىستەن شەتتەتۋدى سۇرادى, دەپ جازدى qandastar.kz

 بۇل تۋرالى Stan.kz اقپارات اگەنتتىگى حابارلايدى.

ايىپتالۋشىلاردىڭ ادۆوكاتتارى ءبىراۋىزدان پروكۋرور دانا سارسەنبايدىڭ قىزمەتىنە ريزا ەمەس. سوزدەرىنشە, مەملەكەتتىك ايىپتاۋشى سوتتالۋشىنى شاتاستىرىپ, قىسىم كورسەتىپ جاتىر. ونىڭ ۇستىنە كاسىبي بىلىكتىلىگىمەن ءىستى زەردەلەمەگەن دەيدى ادۆوكاتتار.

“پروكۋرور ەموتسياعا بەرىلىپ جاتىر. وعان دەيىن مەملەكەتتىك ايىپتاۋشىعا ەسكەرتۋ جاسالدى. پروكۋرور “جابىرلەنۋشىلەرمەن ءبىر جاقپىز” دەيدى. بىراق مەملەكەتتىك ايىپتاۋشى تەڭدەي قاراۋى كەرەك, ەكى جاققا دا جاقتاسپاۋى كەرەك”, – دەدى سوتتالۋشىنىڭ ادۆوكاتى.

بىراق دانا سارسەنباي ادۆوكاتتاردىڭ نارازىلىقتارى پروكۋروردى اۋىستىرۋعا نەگىز ەمەس دەپ سانايدى.

جابىرلەنۋشىلەردىڭ ادۆوكاتتارى “اۋىستىرۋدىڭ قاجەتى جوق” دەپ, دانا سارسەنبايدى قالدىرۋدى سۇرادى.

سوت ايىپتالۋشىلاردىڭ پروكۋروردى اۋىستىرۋ تۋرالى ءوتىنىشىن قاناعاتتاندىرعان جوق.

“سارسەنبايدىڭ سوتقا قاتىستى مۇددەلىلىگى انىقتالعان جوق. سول سەبەپتى مەملەكەتتىك ايىپتاۋشىعا قارسىلىق بىلدىرۋگە نەگىز جوق”, – دەدى سۋديا.

سۋديا دانا سارسەنبايدىڭ ۆيدەو تۋرالى سۇراتۋىن ءىستى زەردەلەمەگەن دەپ تانۋعا كەلمەيتىنىن ايتتى.

ەسكە سالايىق, 2024 جىلى 4 قازانعا قاراعان ءتۇنى تالعاردا 16 جاستاعى شەرزات پولات قازا تاپقان ەدى. ونىڭ ءولىمى قوعامدا ۇلكەن نارازىلىق تۋدىردى. مارقۇمنىڭ اكەسى تۋىستارىمەن جانە جەرگىلىكتى تۇرعىندارمەن بىرگە ءادىل تەرگەۋ جۇرگىزۋدى تالاپ ەتىپ, نارازىلىق ۇيىمداستىردى. بىرنەشە كۇننەن كەيىن, 12 قازانعا قاراعان ءتۇنى نۇرىموۆتار وتباسىنىڭ ءۇيى تولىعىمەن ورتەنىپ كەتتى. باس پروكۋراتۋرا ءورتتىڭ قاساقانا جاسالعانىن مالىمدەدى. الايدا ءۇيدى ورتەگەن كۇدىكتىلەر ءالى كۇنگە تابىلعان جوق.