شەرزات ءولىمى بويىنشا جابىرلەنۋشىلەردىڭ ادۆوكاتى تاعىلعان ايىپپەن جارتىلاي كەلىسپەيدى

فوتو: سكرين

شەرزات پولاتتىڭ ولىمىنە قاتىستى ءىس بويىنشا جابىرلەنۋشىلەردىڭ مۇددەسىن قورعاعان ادۆوكات مەيىرمان شەكەەۆ سوت وتىرىسى اياقتالعانشا قىلمىستىق ءىستىڭ جاي-جاپسارىن جاريا ەتە المايتىنىن مالىمدەدى, دەپ جازدى qandastar.kz

 بۇل تۋرالى Stan.kz اقپارات اگەنتتىگى حابارلايدى.

ادۆوكات قورعاۋشىلار توبى ايىپتاۋشى تاراپتىڭ ءبىر ۇستانىمىمەن كەلىسپەيتىنىن ايتتى, ولار سوت وتىرىسىندا ءوز ۇستانىمىن ءبىلدىرۋدى جوسپارلاپ وتىر.

«ايىپتاۋ قورىتىندىسىنىڭ ءبىر پوزيتسياسىمەن كەلىسپەيمىز, ءوز پىكىرىمىزدى سوتتا ايتامىز. باسقا ايىپتالۋشىلارعا تاعىلعان باسقا ايىپتارمەن كەلىسەمىز», – دەدى ادۆوكات.

شەكەەۆ باستاپقىدا بۇل ىسكە 13 ادام كۇدىكتى بولىپ, كەيىن ەكەۋى الىپ تاستالعانىن ايتتى.

«باستاپقىدا 13 ادام كۇدىككە ءىلىندى. ەكەۋىنىڭ قاتىسى بولماعاننان كەيىن كۇدىكتىلەردىڭ قاتارىنان شىعارىلعان. سونداي-اق ەكى قىز تەك كۋا رەتىندە سۇرالعان, بۇزاقىلىققا قاتىسى جوق دەدى. ايىپتاۋ اكتىسىن بۇرىنعى ادۆوكاتتار كەلىسكەن. ءبىز جاڭا توپپىز. ءىس ماتەريالدارى بويىنشا اشىپ ەشتەڭە ايتىپ بەرە المايمىز. ەكى ازامات – شىناسىل ابزال مەن راۆيل ساكيەۆكە اۋىر ايىپ تاعىلدى. قالعاندارىنا بۇزاقىلىق بابى بويىنشا ايىپ تاعىلدى», – دەدى شەكەەۆ.

ەسكە سالساق, 2024 جىلى 4 قازانعا قاراعان ءتۇنى تالعاردا 16 جاستاعى شەرزات پولات قازا تاپقان ەدى. ونىڭ ءولىمى قوعامدا ۇلكەن نارازىلىق تۋدىردى. مارقۇمنىڭ اكەسى تۋىستارىمەن جانە جەرگىلىكتى تۇرعىندارمەن بىرگە ءادىل تەرگەۋ جۇرگىزۋدى تالاپ ەتىپ, نارازىلىق ۇيىمداستىردى.

بۇگىن شەرزات پولاتتىڭ ءىسى بويىنشا 9 سوتتالۋشى سوت زالىنا اكەلىنگەنى ايتىلدى. پروكۋرور ايىپتاۋ اكتىسىن وقىپ, ايىپتالۋشىلاردىڭ قىلمىس ورنىندا جابىرلەنۋشىنىڭ سول جاق جۇرەك تۇسىنان پىشاق سۇعىپ, مىلتىقپەن ۇرعانىن ايتتى.