جاڭالىقتار
شەرزات پولات ءىسى: پروكۋرور بارلىق ايىپتالۋشىلارعا كىسى ءولتىرۋ بابى بويىنشا ايىپ تاعۋدان باس تارتتى
شەرزات پولاتتى ءولتىرۋ ءىسى بويىنشا وتكەن سوت وتىرىسىندا جابىرلەنۋشى تاراپتىڭ ادۆوكاتى باعداگۇل اجىعاليەۆا بارلىق ايىپتالۋشىلاردىڭ ارەكەتىن ەرەكشە قاتىگەزدىكپەن جاسالعان توپتىق ادام ءولتىرۋ رەتىندە قايتا سارالاۋدى تالاپ ەتتى, دەپ حابارلايدى qandastar.kz
ونىڭ ايتۋىنشا, قازىر نەگىزگى ايىپ تەك قانا ابزال شىناسىلعا تاعىلىپ وتىر.
«ايىپتاۋ اكتىسىنە سايكەس, 2024 جىلعى 4 قازاندا ساعات 00:42-دە “قاماجاي” دۇكەنىنىڭ جانىندا شىناسىل كامەلەتكە تولماعان پولاتتى ادەيى جۇرەك تۇسىنان پىشاقپەن جاراقاتتايدى. پولات قاشۋعا ارەكەتتەنگەنىمەن, 45–50 مەتر جۇگىرگەننەن كەيىن اسفالتكە قۇلايدى. اناسى وعان جۇگىرىپ بارماق بولعان, بىراق شىناسىل مەن ءىلياسوۆ كەدەرگى بولعان», – دەدى اجىعاليەۆا.
Skifnews.kz جازعانداي, ول شابۋىلدىڭ ۇيىمداسقان سيپاتتا بولعانىن اتاپ ءوتتى.
«وسىدان كەيىن اسكەنتاي, توقتاۋباەۆ, ساكيەۆ جانە شىناسىلدان قۇرالعان توپ شەرزاتقا قاراي بەت العان. اناسىنىڭ قارسىلاسقانىنا قاراماستان, بەلعوجاەۆ شەرزاتتىڭ باسىنا بىرنەشە رەت پىشاقپەن, ءىلياسوۆ مىلتىقپەن ۇرعان. قالعاندارى قولمەن ۇرىپ, اياقپەن تەپكەن. ساعات 01:30-دا شەرزات تالعار اۋرۋحاناسىندا كوز جۇمدى», – دەدى ادۆوكات.
اجىعاليەۆا پروكۋرورعا جاڭا ايىپتاۋ اكتىسىن دايىنداۋعا ۋاقىت بەرۋ ءۇشىن سوت وتىرىسىن كەيىنگە قالدىرۋدى سۇرادى.
«ۇسىنىلعان دالەلدەرگە سۇيەنە وتىرىپ, اسكەنتاي, توقتاۋباەۆ, بەلعوجاەۆ جانە ءىلياسوۆتىڭ ارەكەتتەرى 293-باپتىڭ 3-ءبولىمى, 24-باپتىڭ 3-ءبولىمى جانە 99-باپتىڭ 2-ءبولىمى “توپ بولىپ, ەرەكشە قاتىگەزدىكپەن كىسى ولتىرۋگە وقتالۋ” بويىنشا سارالانۋى ءتيىس دەپ سانايمىز. ساكيەۆكە 99-باپ بويىنشا قاتاڭىراق جازا تاعايىنداۋعا نەگىز جەتكىلىكتى», – دەدى ادۆوكات.
الايدا ايىپتاۋ تارابى بۇل وزگەرىستەرگە قارسى شىقتى. پروكۋرور دانا سارسەنباي تەرگەۋ بارىسىندا بارلىق ماتەريالدار مۇقيات زەرتتەلگەنىن اتاپ ءوتتى.
ء«وتىنىشتى قاناعاتتاندىرۋدان باس تارتۋدى سۇرايمىز. الدىن الا تىڭداۋ وتكىزۋ قاجەتتىلىگى جوق دەپ سانايمىز. ءوز ۇستانىمىمىزدى تاراپتاردىڭ جارىسسوزىندە بىلدىرەمىز», – دەدى سارسەنباي.
سۋديا ەربول جانۇزاقوۆ ەكى تاراپتى تىڭداپ, ايىپتاۋدى قايتا سارالاۋ تۋرالى ءوتىنىشتى قاناعاتتاندىرۋدان باس تارتتى. ول مۇنداي شەشىم تەك پروكۋراتۋرا قۇزىرىندا ەكەنىن باسا ايتتى.
«بۇل كەزەڭدە الدىن الا تىڭداۋ وتكىزۋگە نەگىز جوق. قىلمىستىق ءىس جۇرگىزۋ كودەكسىنىڭ 340-بابىنا سايكەس, سوت ءىستى تەك ۇسىنىلعان ايىپتاۋ شەڭبەرىندە قارايدى. ايىپتالۋشىلاردىڭ كىنالى نەمەسە كىناسىز ەكەندىگى كەڭەسۋ بولمەسىندە شەشىلەدى. مەملەكەتتىك ايىپتاۋشىلار قاجەت دەپ تاپسا عانا جاڭا ايىپتاۋ اكتىسىن دايىنداۋعا ۋاقىت بەرىلۋى مۇمكىن», – دەپ ءتۇسىندىردى سۋديا.
وسىلايشا, سوت جابىرلەنۋشى تاراپتىڭ ءوتىنىشىن قاناعاتتاندىرمادى. ءىس بۇعان دەيىن تاعىلعان ايىپ شەڭبەرىندە قارالاتىن بولادى.
