Sherzat Polat isi: Prokýror barlyq aıyptalýshylarǵa kisi óltirý baby boıynsha aıyp taǵýdan bas tartty

Sherzat Polatty óltirý isi boıynsha ótken sot otyrysynda jábirlenýshi taraptyń advokaty Baǵdagúl Ajyǵalıeva barlyq aıyptalýshylardyń áreketin erekshe qatygezdikpen jasalǵan toptyq adam óltirý retinde qaıta saralaýdy talap etti, dep habarlaıdy qandastar.kz

Onyń aıtýynsha, qazir negizgi aıyp tek qana Abzal Shynasylǵa taǵylyp otyr.

«Aıyptaý aktisine sáıkes, 2024 jylǵy 4 qazanda saǵat 00:42-de “Qamajaı” dúkeniniń janynda Shynasyl kámeletke tolmaǵan Polatty ádeıi júrek tusynan pyshaqpen jaraqattaıdy. Polat qashýǵa árekettengenimen, 45–50 metr júgirgennen keıin asfaltke qulaıdy. Anasy oǵan júgirip barmaq bolǵan, biraq Shynasyl men Ilııasov kedergi bolǵan», – dedi Ajyǵalıeva.

Skifnews.kz jazǵandaı,  ol shabýyldyń uıymdasqan sıpatta bolǵanyn atap ótti.

«Osydan keıin Áskentaı, Toqtaýbaev, Sakıev jáne Shynasyldan quralǵan top Sherzatqa qaraı bet alǵan. Anasynyń qarsylasqanyna qaramastan, Belǵojaev Sherzattyń basyna birneshe ret pyshaqpen, Ilııasov myltyqpen urǵan. Qalǵandary qolmen uryp, aıaqpen tepken. Saǵat 01:30-da Sherzat Talǵar aýrýhanasynda kóz jumdy», – dedi advokat.

Ajyǵalıeva prokýrorǵa jańa aıyptaý aktisin daıyndaýǵa ýaqyt berý úshin sot otyrysyn keıinge qaldyrýdy surady.

«Usynylǵan dálelderge súıene otyryp, Áskentaı, Toqtaýbaev, Belǵojaev jáne Ilııasovtyń áreketteri 293-baptyń 3-bólimi, 24-baptyń 3-bólimi jáne 99-baptyń 2-bólimi “Top bolyp, erekshe qatygezdikpen kisi óltirýge oqtalý” boıynsha saralanýy tıis dep sanaımyz. Sakıevke 99-bap boıynsha qatańyraq jaza taǵaıyndaýǵa negiz jetkilikti», – dedi advokat.

Alaıda aıyptaý taraby bul ózgeristerge qarsy shyqty. Prokýror Dana Sársenbaı tergeý barysynda barlyq materıaldar muqııat zerttelgenin atap ótti.

«О́tinishti qanaǵattandyrýdan bas tartýdy suraımyz. Aldyn ala tyńdaý ótkizý qajettiligi joq dep sanaımyz. О́z ustanymymyzdy taraptardyń jaryssózinde bildiremiz», – dedi Sársenbaı.

Sýdıa Erbol Januzaqov eki tarapty tyńdap, aıyptaýdy qaıta saralaý týraly ótinishti qanaǵattandyrýdan bas tartty. Ol mundaı sheshim tek prokýratýra quzyrynda ekenin basa aıtty.

«Bul kezeńde aldyn ala tyńdaý ótkizýge negiz joq. Qylmystyq is júrgizý kodeksiniń 340-babyna sáıkes, sot isti tek usynylǵan aıyptaý sheńberinde qaraıdy. Aıyptalýshylardyń kináli nemese kinásiz ekendigi keńesý bólmesinde sheshiledi. Memlekettik aıyptaýshylar qajet dep tapsa ǵana jańa aıyptaý aktisin daıyndaýǵa ýaqyt berilýi múmkin», – dep túsindirdi sýdıa.

Osylaısha, sot jábirlenýshi taraptyń ótinishin qanaǵattandyrmady. Is buǵan deıin taǵylǵan aıyp sheńberinde qaralatyn bolady.